Cosplay嚟講，除咗套衫、化妝同個假髮之外，其實道具都好重要。不過買現成道具咁貴（特別係官方出嗰啲），識玩梗係自己自製道具啦！而講到買材料，日本嘅coser就大大力推介去100円店度買嘞。

話說，最近日本Twitter興起一種玩法，就係大家要將100円店嘅商品大改造，實行對的商品錯的用法咁話喎！而且搞下搞下竟然仲變埋做cosplay道具大鬥法?！一齊睇下～

好似呢位網民咁，佢喺100円店買咗噴水壺、玩具雞髀、輕黏土同顏料咋嘛，咁就畀佢輕而易舉地整咗隻燒雞出嚟喇喎！嘩，噴水壺都可以變燒雞，真係仲神奇過藥箱都變成首飾箱呀！

咦，家陣玩緊整道具喎，另外呢位網民拎幾件蛋糕出嚟做乜9呀？乜100円店都有蛋糕賣㗎咩？

睇真啲，原來呢幾件蛋糕係用100円店嘅海綿同黏土整成㗎！喂好喇喎你哋，整啲像真度咁高嘅嘢食出嚟係咪想欺騙毛毛感情呀？（好啦，畀你呃到喇……）

既然食物可以整到真嘅一樣，武器都得啫！

睇下呢支狙擊槍手工幾精美，簡直就精美到好似喺模型舖買返嚟咁！喂老老竇竇，呢支槍係咪真係用100円店嘅嘢改造出嚟㗎……

嗱，有圖有真相，呢支槍真係逐件砌出嚟㗎！

溫提：如果想睇埋其他網民點樣將100円店嘅商品大改造，只要喺Twitter度search「#百均のグッズ間違った使い方選手権」就搵到㗎喇。

封面圖片及資料來源：curo___date／twitter、lune_touka／twitter、Maxifactory／twitter