2017年03月12日 星期日
【生無可戀】估唔到貓貓同對模型人手又冇乜違和感喎！
喵星人呢種外太空生物以貓貓嘅身份嚟到地球，潛伏各大城鎮，目的顯而易見，就係反客為主，征服地球，統治人類！根據多年嚟收集到嘅資料所得，喵星人智慧極高，日間就監視人類一舉一動，夜間就趁貓奴瞓著覺、警覺性下降嘅時候撞密碼偷睇佢電腦，對人類做成極大威脅。
最近，仲有情報發現有喵星人疑似不慎露出外星人原形！喵星人一直都以其可愛軟綿綿嘅肉球收服人類，令妹豬一見到佢哋粉嫩粉嫩嘅腳仔就做出不能自控嘅行為，例如尖叫「巧打耳呀！」但係呢隻面圓圓嘅喵星人，就唔小心畀人見到佢對人手，相信係人類史上第一次紀錄到喵星人原形！貓頭貓身但就進化到有對人手，喵星人真係唔可以睇小呀！
講笑咋，喵星人咁醒目，又點會咁易畀人類見到佢嘅原貌呀～ 其實係有個手多多嘅貓奴，將對模型人手擺喺主子嘅肉球前面整蠱佢咋～
「好心呢～福心呢～可憐我呢個扁面喵星仔呢～真飢餓咯～」
主子，你又係入戲咗少少嘅，雖然成個樣生無可戀咁，但奴才知道你一定係諗緊今晚食紫薯三文魚罐罐定拉絲吞拿魚罐罐囉……
乜你覺得喵星人同對模型人手好有違和感咩呀？叮噹都有手指啦，喵星人有對人手又有咩咁出奇喎！
— em !! (@apricotbelly) March 9, 2017
封面圖片、資料來源連結：apricotbelly／twitter
