一打開個FB，無論係喺啲Post定喺下面啲CM都見到一隻紫色嘅鴿喺度係咁揈呀揈，真係睇到人硬晒呀，係煩膠到令人個拳頭硬晒呀！話時話，日日咁揈法，阿鴿你條頸唔攰㗎咩？

哎吔！都叫咗你唔好係咁揈㗎啦！出事㗎嘛！美國有隻野鴿，唔知係咪見揈頭鴿咁紅跟埋一齊揈，居然斷咗頸骨呀！好彩有兩個唔怕禽流感嘅路人甲乙見到佢，執咗佢去見專醫野生動物嘅診所咋！

路人甲乙今次係醒嘅，因為原來坊間大部分團體都會界定野鴿做「害蟲」，同埋斷頸骨嘅雀好少有得救，所以通常都唔會受理。但係佢哋搵呢間診所就一向有救無類，所以Challenge Accepted！

獸醫幫鴿姐照過X光，就估佢唔係揈甩頸，可能係飛飛下撞親，或者唔知邊個咁衰格當正阿鴿係揈頭鴿咁玩斷咗佢條頸囉，不過阿鴿啲手手腳腳都冇事，應該有得救嘅。人斷頸骨就話可以打石膏啫，鴿可以點搞呀？

首先要固定條頸先，用平日打石膏用嗰啲墊放喺頸度當頸箍再用綳帶包住，咁咪唔怕移位囉～本來醫生預阿鴿今次傷得咁重，應該有排先好得返㗎喇⋯⋯

點知過幾日，醫生幫鴿姐換頸箍嗰陣，發現鴿姐已經可以抬起頭做鴿喇，就算擺佢去大房，佢同其他院友一齊開餐都冇問題呀！不過穩陣起見，都要包多一排先嘅。

多得醫生連一隻雀都肯咁花心思救，鴿姐而家先可以仍然乘著狂風，天空中愛得英勇咋！換轉喺其他地方，鴿姐可能已經畀人當咗係禽流病鴿，或者拎咗去燉老鴿湯喇！你話呀，如果這都不算愛，仲會係咩先得㗎～

封面圖片及資料來源：the Dodo