而家樓價咁高，個個都以為做地產一定好好搵啦～其實風光嘅背後，佢哋嘅辛酸又有邊個知吖，成日要帶啲客周圍睇樓，啲客又鍾意嫌三嫌四壓價，有時仲要出賣良心，明明間屋似棺材，都要吹到似諾士佛臺。估唔到而家仲要出賣埋肉體呀！

呢個單位坐享無敵山景，一望無際⋯⋯仲有一隻雀?！喂，賣樓啫，唔使做雞⋯⋯Sor，係做雀下化？呢間英國嘅地產代理，話見賣家咁玩得，於是咪同佢玩大佢囉！

古有雕兄幫小龍女同楊過看屋，今有鸚鵡兄幫經紀賣樓，鸚鵡兄真係唔話得，仲特登換返套飲衫嚟介紹個飯廳?！

「個天台都幾闊落㗎，得閒仲可以同班雀友一齊撚下雀，BBQ下?！」

雀兄，睇L住呀，燒還燒，一陣燒埋自己做紅燒鸚鵡就唔好啦！

「金絲雀～金絲雀～金色美麗似鳳⋯⋯」但雀兄，你鸚鵡嚟㗎喎。呢啲咪正宗瞓身演出囉！咩話？瞓埋喺張床都唔夠瞓身？咁得喇啩！

高清冇格仔出浴照流出！嘩，雀兄真係犧牲埋色相，連出浴照都幫你影埋，仲要冇著衫淨係帶住頂浴帽咋，真的暴露鳥！

咁賣樓法，係咪真係得㗎？地產代理嘅發炎人就話，自從雀兄一出，真係多咗好多人話要睇呢間屋呀！但係間屋而家都仲放緊盤喎⋯⋯梗係啦！你估啲人真係想睇樓咩，想睇雀兄真人咋～一於請雀兄做代言人，專係陪大家睇樓，睇樓團承惠每人三嚿，一定商機無限啫！
 

封面圖片及資料來源：Rightmove