儲嘢係一門藝術，因為通常藝術嘅嘢，唔係人人都識欣賞，特別係你阿媽。無論你儲緊啲咩，只要你喺阿媽面前證明唔到啲嘢有用，阿媽都會話：「成日儲埋啲無謂嘢，冇用就掉咗佢啦」。話明儲嘢，最重要嘅作用咪就係儲囉，唔係點啫～其實有啲嘢儲完係真係有用㗎！

呢家人用咗超過5年時間，儲咗二千幾個樽蓋，嘩，咁一年咪要儲成幾百個？放心，好似你哋儲印花咁，你話要儲，又點會得你一個儲呀，一班Fd子梗係會幫你儲埋一份㗎啦～更何況只係樽蓋呢？

但係儲埋咁多樽蓋做咩先～唔通老竇細個儲開蓋掩，想將呢樣男人嘅浪漫傳畀仔女？原來係用嚟裝修廚房呀！仲搵埋阿仔阿女幫手分類?，記得睇手呀，啲蓋邊都幾利㗎下～

睇唔出你哋又幾砌得喎！將啲樽蓋一個個砌喺個L字檯，仲要跟埋顏色咁，但係啲樽蓋唔會個個一樣㗎嘛～凹凹凸凸咁，會唔會好睇唔好用㗎？所以屋主就話，呢個工程最難就係要排到個面夠平，咁倒啲樹脂落去固定嗰陣先唔會積喺一個位度喎。

為咗製成品唔會望落一截截色咁死板，屋主仲特登唔將一種顏色同另一種嘅顏色嘅樽蓋分得咁清楚，等張檯嘅Pattern好似自然漸變咁?～

個完成品又幾特別喎～仲好環保?！屋主話最緊要係喺整檯嘅過程入面，屋企人互相交流去做好一件事，咁又真係寧舍有滿足感嘅～儲咗5年，就係為咗整一張檯，值唔值得就見仁見智啦～話晒自己屋企，最緊要係自己鍾意啫係咪？

封面圖片及資料來源：Boredpanda