多得一首歌，阿雞今年真係吐氣揚眉，成為眾人嘅焦點呀！不過再肥美嘅雞，都有覺得空虛，覺得寂寞，覺得凍嘅時候㗎！又有邊個會明白，當每個人仲瞓緊嘅時候，得佢眼光光瞓唔返，你話除咗向住個天9叫仲有啲咩做吖？到有溫暖包圍佢之日，就係佢魂歸焗爐之時喇！

唔怕，呢個世界上除咗做雞永遠是對的嘅白頭佬，仲有好多人願意畀溫暖阿雞你㗎～好似呢班卡哇依嘅婆婆，每日織織復織織～退休繼續織～織勻七隻色～就係為咗織畀一班雞友咋！

原來一班住喺教育機構嘅雞朋咯友換緊毛，咁啱撞正凍到抽筋嘅冬天，冇毛容咩易冷親感冒變禽流病雞㗎！佢哋仲要同班小朋友去蒲㗎喎！所以一班婆婆咪織啲冷衫仔幫佢哋保暖囉～

雖然呢班婆婆織藝超群，但係幫雞織冷衫呢家嘢咁破格，就算你不愛失敗，但成功嘅老母都係會搵上你㗎！呢件咁似童貞必殺服嘅冷衫咁Deep V，容乜易冷親個雞胸㗎？婆婆都係再織過罷啦～

今次呢件就差唔多喇～你睇下阿雞幾得戚，仲Chok晒樣成個Model咁呀，阿雞，望落係醒咗喎！

一班雞友有婆婆嘅溫暖牌愛心冷衫著咁開心，聽機構負責人講，連蛋都生多咗幾隻呀！其實有人織冷衫畀自己，真係一件好幸福嘅事嚟㗎⋯⋯嗚⋯⋯毛毛都好想有人織冷衫畀我呀！

封面圖片及資料來源：the Dodo

睇埋：【係愛呀】北印度遇冷鋒 好心村民織冷衫幫大象保暖