可以喺返工之前空肚食個靚早餐，真係奢侈嘅享受呀！去茶記食早餐，即係要起碼早成粒鐘起身返工，係瞓覺同食早餐之間作出選擇，真係人生嘅一大難題⋯⋯所以一係唔食，一食就要食好西先得！一於加1蚊烘底先！

唔好睇少一塊多士呀，要內外兼備，外脆內軟咁先可以叫做一塊好多士㗎！但係多士始終係一塊多士，可以做得出咩花樣呀？

邊個話整唔到呀？整架《高達》嘅核戰機出嚟都仲得呀！日本有位網友諗住去買個包食啫，點知就畀佢發現到呢部好多士核戰機喇！睇真啲，後面仲有消防車，連堂雲梯都整埋出嚟呀，真係連玩慣模型嘅網友都要寫個服字呀！唔知揭開會唔會見到阿寶坐喺駕駛座呢？

睇唔睇到呀？最估佢唔到嘅，係連個引擎噴出嚟啲煙都用棉花糖整埋呀！連啲咁細微嘅地方都做到一絲不苟，果然這就是日本呀下！喂，橫掂台場嗰架元祖高達拆咗，不如你哋喺度砌返部啦！

其實識玩多士嘅又點止日本人吖，外國有個老竇為咗囡囡每朝早都有個Good Morning，日日都用兩塊多士整出唔同嘅嘢呀，用多士扮Pancake，Easy啦～

奧斯卡金像獎同埋機械人都整到，呢啲先叫高呀！不過整到咁靚，囡囡點捨得食呀？

日本神之手識整消防車同核戰機，呢位老竇都唔輸蝕，整返部拖拉機先！雖然成日都話不要玩食物，但係見到啲咁簡單嘅嘢食，都可以整得咁得意，食都食得開心啲啦～

封面圖片及資料來源：RETORUENO／twitter、2slicesoftoast​／instagram、巴哈姆特