所謂乙女Game，就係女性向愛情遊戲，通常仲會膽拖埋逆後宮，女主角遇到n個靚仔男主角，然後就要諗下點同佢哋發展咁囉～咪睇少呢啲遊戲，有好多妹豬為咗佢哋入咗課金嘅無底深坑㗎，甚至威力強大到連大台都要靠佢哋幫手呀！

講緊嘅係日本大台NHK電視台呀，是咁的，話說喺日本，只要你有電視或者任何受到NHK訊號可以睇到佢哋節目嘅裝置，就會有人撳你個Lin Lin（講緊門鐘呀），上門搵你簽約收返個收視費㗎喇～但係似乎好多居民都唔多滿意呢個安排啵，咁就唯有出動美男計啦！

為咗宣傳「收視費就是正義」呢個大道理，NHK最近出咗個乙女Game，搵咗四大美男講啲肉麻到震嘅對白嚟冧一班師奶同妹豬，務求要令佢哋乖乖交出一顆心⋯⋯同埋收視費呀！遊戲一出，大家嘅焦點都去晒一個人身上！

你咪就係西⋯⋯門吹雪？呢位員工肯肯定係冇食啲乜乜烏絲素啦！嗰幾條唏噓嘅髮絲真係搶晒Fo呀，啲觀眾都畀你溝晒啦～原來佢係年資廿五年嘅營業部員工阿涼呀，真係人如其名，見到個髮型都覺得有啲涼⋯⋯

仲要講埋啲「當然係你同收視費一樣咁重要啦！」 嘅對白，一感動唔止會流眼淚，連條頭毛都飛起埋，呢啲角色設定係咩玩法呢下⋯⋯

一個咁有喜感嘅角色，配落咁唯美嘅畫面⋯⋯做咩啫你！

當然，唔慣咁重口味嘅都仲有其他選擇嘅，眼鏡男、肌肉男同穿越古裝男都係唔錯嘅選擇嚟㗎～Between，NHK淨係向啲妹豬埋手，公平咩？你再唔嗱嗱臨出返啲美人主播呀女子社員之類嘅Game畀男觀眾，信唔信一班宅男集體罷繳收視費吖嗱！

封面圖片及資料來源：NHKキュン活ほっとらいん、suno_31／twitter