呢一年，只要聽到「Apple」、「Pen」、「Pineapple」呢啲關鍵字眼，甚至只係「Ugh」一聲，就會諗起令人聞風喪膽嘅PPAP，洗腦同煩膠程度仲勁過Let it go，唔止8歲到80歲都識唱，仲要連慈母都要玩埋一份。救命呀！你以為呢股熱潮完咗就冇事？實在太天真太傻喇！

只要你去日本行一轉，你就會發現，PPAP仲潛伏係不同嘅角落，隨時嚇你一跳㗎！

有日本網友想去買杯嘢飲啫，點知一抬頭就見到⋯⋯乜又係你呀陳生？算啦，菠蘿蘋果汁，諗落都係fresh嘅，好！我忍你！

點解！點解過咗兩三個月，喺7仔出嘅新商品度都要畀我見到你呀！完喇好嗎？今次係菠蘿蘋果批，即係Pineapple－Apple－Pie呀！

見到呢個批個名，雖然少咗個P，但係仲好似隱隱約約聽到嗰個Beat⋯⋯同埋自動load到把聲⋯⋯「I have a pie, I have a pineapple,ugh! Pie Pineapple……」 天呀！究竟幾時先唔使再聽到呢首歌呀？更可怕嘅係，如果一向有出蘋果批嘅麥噹噹又玩埋一份⋯⋯

一諗起麥噹噹叔叔同Piko大叔一齊拎住個Pie喺度跳PPAP X 藍藍路⋯⋯個畫面仲要不斷喺個腦海度無限循環⋯⋯唉，不如都係一槍打死我罷啦！

封面圖片及資料來源：arakaysmt／twitter