聽講，世上有兩種人嘅電話特別容易快用晒儲存空間，一種係自戀妹豬，無論等緊?食緊飯定試緊衫都要自拍，成個相簿都係佢嘅照騙（雖然同一個角度）；另一種就係有養寵物嘅人喇。作為一個稱職嘅小主人，梗係要兼職埋自己嘅汪星人嘅私狗攝影師，時時刻刻幫佢影靚相啦～

對主人嚟講，汪星人就係佢心肝寶貝，無論佢覺覺豬、打喊露、定屙緊便便個樣，都係咁打耳，一秒都唔可以錯過㗎！呢隻汪星人就使出緊柴柴電鑽呢招喇，呢個moment真係可遇不可求㗎，主人你唔好講咁多喇，快啲影低先啦，一陣佢鑽完就冇㗎喇！

咦喂，面容扭曲咁樣樣嘅？同頭先隻靚仔柴完全唔同feel喎，唔好趁自己隻狗狗行開咗，就即刻影其他狗咁花心先得㗎！

「主人……你唔好襯我揈緊頭嘅時候影我得唔得呀汪？你影到我好似傻仔呀！仲有本汪警告你唔好又post上啲咩狗狗group度呃like呀，下次落街見到旺財佢哋，實畀狗笑到面都黃！」

真係估唔到，原來呢隻肥肉橫飛、眼都逗雞埋嘅狗狗，同頭先嗰隻係同一隻嚟喎！所以話，時影相除咗要識搵角度，仲要啱timing呀，唔係點用美肌app執都幫你唔到㗎喇！

柴ドリル！！！
元の顔がどんなんか忘れる pic.twitter.com/qh3KoH0lDz

— いたずらっ子 柴犬ゆず (@shiba_yuzukichi) March 6, 2017

封面圖片、資料來源連結： shiba_yuzukichi／twitter