喺呢個速食年代，咩都嚟得快去得快，痴心情長劍？好難搵喇。唔好以為毛毛講緊成日換畫嗰啲playboy呀，毒L都一樣有花心嘅權利！手提電話都一年換一部啦，有得打PS4，唔係仲攬住PS3下話？

不過日本呢個網民就唔同諗法喇，佢買咗部PS4之後，當然要同舊戰友PS3講再見啦。話晒部PS3都陪佢經歷過咁多空虛寂寞凍嘅晚上，令佢喺打機嘅過程搵返自信同人生意義，點可以是是但但賣畀收買佬或者掉出門口咁衰仔㗎？

就算決定咗同第三者一齊，要同大婆分開，如果可以嘅話，多數人都應該想好嚟好去，同大婆開心埋最後一晚嘅……於是，呢個網民就帶阿3出街街，同佢留低美好回憶喇。佢哋兩個一齊喺冇人嘅街上踩滑板，好似重拾初相識嘅青澀感覺咁呀。

佢驚阿3會凍親，仲特登幫佢戴埋冷帽，真係好細心呀……
阿3：「其實你仲關心我㗎係咪呀！點解要分開呀！我唔明呀唔明呀！」

唔好咁啦，發生啲咁嘅事，大家都唔想……阿3一直咁喊呀喊，喊到攰，終於都喺主人個被竇入面，聞住佢最熟悉嘅氣味瞓著咗。可惜，主人已經決定咗要同阿4展開新生活，唯有選擇喺阿3進入夢鄉嘅時候靜靜離開佢……好多女仔都唔鍾意男朋友打機，不過打機打到好似呢個咁情深深，都算係半個暖男吖？

これか、PS3が寝てる動画 pic.twitter.com/HWwIMGyPej

— おっぺにちゃん (@xiahornet) March 16, 2017

封面圖片、資料來源連結： goooooripi／twitter