適逢DSE考試季節，一班莘莘學子都已經開始考中文口試喇～其實口試呢樣嘢，又點止學生要考呀，打工仔每次畀腦細捉入房傾偈都係一場嚴峻嘅口試⋯⋯就連行政長官候選人都要考口才呀！咁幾位行政長官候選人又係咪一個合格考生呢？今日毛毛就邀請咗現職嘅中學中文科老師，評下候選人今次論壇其中一條題嘅表現喺中文口試又值幾分呢？

討論題目：現時醫院病人有太多單程證持有人只係香港居民嘅遠親，懷疑有濫用制度加重醫療負擔嘅情況，三位候選人會唔會收返單程證審批權呢？

（請由01:19:46 睇到 01:24:08，多謝合作。）

評分：Lv3

老師點評：似有還無，好似有講嘢，其實係虛招兜圈無承諾，理據稍嫌粗略，淨係話會認真處理睇下有無辦法協商，但總算回應緊題目問嘅單程證審批問題。

毛毛亂評： 薯片叔叔果然打得！一嚟就話要打擊濫用，好波！但係後面就淨話會同啲部門睇下有冇辦法處理，咁如果人哋話冇辦法咁點呢下？

評分： Lv1

老師點評：應該同條問題disconnected ，見解唔明確，淨係聽到前半段醫療，就淨係答醫療，放虛招話要減輕前線工作壓力，完全無聽清楚問題核心，Fail⋯⋯

毛毛亂評：⋯⋯呢位同學你走喇，我唔想搞大件事呀。

評分：Lv4

老師點評：大致能就題目俾出明確見解，用詞偶爾唔夠準確但唔影響整體表達，回應相對另外兩位完整，建議尚算具體⋯⋯雖然講得出同做得到係兩回事。

毛毛亂評：沉睡中嘅胡官終於都甦醒喇！果然三點不⋯⋯唔好意思，係深藏不露先啱。

有件事，毛毛真係忍唔住唔問老師，是咁的，毛毛發現林同學每逢答問題嗰堂古惑的眉都會間歇性抽搐，根據非正式統計，一分鐘成十幾廿下喎！平均請問咁樣會唔會影響分數呢？

老師表示： 唔會，樣衰唔係扣分理由。嗯，老師果然專業公正呀下。

影片及資料來源：RTHK 行政長官選舉論壇直播