話說呢，毛毛屋企最近大裝修，要將所有嘢封晒入箱呀。無論幾想著到好似行show咁返工，都只係可以留返最百搭嗰幾件著住先咋！收得起啲衫，鞋梗係都冇得倖免啦，於是毛毛諗嚟諗去，原來只可以留返一對鞋嘅話，一定係留對百搭之王－白鞋！

白色鞋係就係易襯，不過一污糟少少，就會好似喺自己鼻頭生瘡咁礙眼、咁肉酸囉……作為一隻愛整潔嘅小白兔，點可以容許自己踩住對爛臭鞋出街呢，今日一於試下擦膠、洗甲水同埋牙膏，用邊樣嚟清潔對鞋最乾淨啦，有請毛鞋！

大家可以睇到毛毛對帆布鞋都有返咁上下歲月痕跡，帆布部份經歷風吹雨打，試過唔少方法都救唔返，不過側邊膠質部份就應該仲有得救嘅，留意鞋頭，真係污糟到喊。

測試一：擦膠

呢嚿笨唔係一般文具舖買到嘅擦膠，而係清潔帆布鞋專用嘅擦膠，40幾蚊粒，好多格仔舖都有得賣。

擦完之後可以明顯見到啲灰黑污漬已經畀擦膠消滅咗喇，效果唔錯！

缺點：攰啲囉，同埋擦到一地都係擦膠碎，大家記得搵張紙墊住先呀。

追加：雖然主要唔係想睇佢擦唔擦到帆布，不過都順便擦埋啦，可能對毛鞋真啲漬真係食得太深，好似冇乜效果。

測試二：洗甲水

用洗米水、梳打粉呢啲嚟清潔波鞋就聽得多，洗甲水都係第一次！洗甲水連指甲油都抹得走，應該ok啩？

首先滴少少落化妝棉（冇就用紙巾啦不過冇咁好抹），之後就慢慢抹～留意呀，毛毛都唔知會唔會傷波鞋㗎，驚就唔好用貴鞋嚟試，同埋淨係抹表面，小心避開邊邊位會穩陣啲。

嘩，一抹就乾淨，慳水慳力！

缺點：要忍受少少攻鼻嘅氣味，同埋冇戴膠手套就會乸到手指頭有啲乾。

測試三：牙膏

向上刷～向下刷～不可放任胡亂刷～用平時刷牙咁嘅牙膏份量再刷刷刷就得㗎喇，之後記得過乾淨水呀！

效果都唔錯咁啵，又唔係好嘥力，加上有牙刷幫手，連邊邊罅罅位都可以洗乾淨！

注意：記得用舊牙刷嚟洗呀下……

頭盔：毛毛每次清潔嘅力度、時間同心情有可能唔同，影響最後個效果㗎下。

總結嚟講呢，洗甲水同牙膏都又乾淨又方便，連毛鞋都話正呀！不過驚洗甲水太刺激會傷到對鞋嘅話，就用牙膏好啲喇～