可能大家都對靚女了解唔深，或者根本就連同佢哋相處嘅美好機會都冇啦，成日就以為靚女放屁係香嘅，甚至連屁都唔放?！講笑咩，女神都係人，女神都有靈魂，女神都會有不為人知嘅一面㗎！其實唔止女神㗎，你同我咪一樣咁多核突小習慣～

慢慢欣賞黑頭貼

你估黐鼻貼最大目的就係清黑頭咩？啱咗一半啦，係清晒啲黑頭出嚟方便自己欣賞就真呀。上網睇人哋唧瘡嘅片已經覺得夠晒治癒，自己嘅黑頭，唔係唔親眼慢慢多角度細心欣賞呀？

大力索撩完耳仔嘅棉花棒

同欣賞黑頭貼有異味同工之妙，未聞過真係唔好話自己愛惜身體！睇住原本白雪雪嘅棉花棒入一入個耳仔窿之後，就變到黃黚黚，真係爽歪歪！一邊轉支棉花棒一邊感謝今日有大豐收之餘，當然要聞一聞，醒腦提神啦～

Legging著幾次先洗

無論天氣幾凍都好啦，做得女神，都要著返條短裙扮下靚嘅，最多咪加條Legging或者黑絲打底囉！日日都要著，Legging就得嗰幾條，著多兩日先洗啦。

食返粒牙屎 

自古以來，人誰無菜？I mean攝喺牙罅嗰條菜呀，仲唔嗱嗱聲用牙簽撩走佢？阿媽教落，食得唔好嘥，記得將牙簽上嘅菜渣a.k.a.牙屎輕輕黐落脷尖呀。

個頭唔油就唔洗

可能男人們都好想問到底點解女仔對洗頭有咁大畏懼，你哋有所不知喇！洗頭唔係問題，吹頭先係困難呀！吹到隻手臂攰晒、個身又熱晒，仲大汗過未沖涼，唔洗好過啦。

第一日，冇乜油，唔洗。

第二日，搽少少爽身粉即刻（睇落）唔油，唔洗。

第三日，開始出油喇，紮起咪得囉，唔洗。

第四日，開始有啲臭，戴帽咪得囉，唔洗。

第五日，唔使出門口，又避過一劫喇yeah！

係咪睇到打晒冷震，覺得毛毛好似日日都偷睇你嘅日常生活，知道晒你獨處時候嘅一舉一動咁呢……傻啦，我先冇偷睇呀，不過點解毛毛會知？冇呀，我唔會認我都有呢啲習慣㗎！點都唔會認㗎！