小豆島位於日本香川縣，島上有唔少打卡靚位，當中最出名嘅都應該非「天使之散步道」莫屬嘞。日本人將呢個連島沙洲包裝成戀人聖地咁樣樣，相傳只要同另一半手拖手咁行完呢條「天使之散步道」，咁就可以快快樂樂咁生活落去喎……

哦，想行「天使之散步道」咋嘛？其實近近地，香港西貢都有一個啦（好似係）！

喺西貢公眾碼頭搭十幾分鐘船就可以去到嘅橋咀島，同日本小豆島一樣有個要等潮退先可以行到嘅沙洲，拖住另一半慢慢咁行過去都不知幾浪漫！Er……咁當然如果你暫時未有另一半嘅話，一個人帶住相機嚟影下景都唔錯啦，55。

雖然講真嗰句，港版「天使之散步道」比起日版「天使之散步道」就多啲沙石，冇咁好行，不過港版「天使之散步道」勝在夠近，想話同另一半夾假都唔會夾到2046吖嘛～

再講吖，情路咁難行你哋都行到，區區一條沙石路又算得係啲咩喎？濕濕碎啦！

嗱，而家浪漫散步道就有嘞，咁橋咀島嘅海水水質又有冇日本嗰邊咁好先？話晒條散步道兩邊都係海，一路行一路望住啲絕望嘅死水真係會咩feel都冇晒㗎嘛……

橋咀島海水水質好唔好？毛毛唔用說話嚟答你哋，毛毛用圖嚟答你哋：

估唔到原來橋咀島嘅水質都唔輸蝕，一樣可以清澈見底㗎啵～

點去西貢橋咀島：

喺西貢公眾碼頭搭街渡，大約15分鐘就會到橋咀島碼頭。（溫馨提示：話明潮退先行到，嚟之前就唔好唔記得check潮退時間咁戇夸夸喇。）