返工咁辛苦，放咗工最好就梗係開一堆零食睇下笑片Relax下，電視冇嘢睇又唔知睇咩好，其實除咗煲劇，睇返以前啲笑片都幾好吖，以前有啲大堆頭嘅製作，真係由上至下都粒粒星，最緊要，係真係好笑呀嘛⋯⋯
《大富之家》
大卡士指數： 3.5粒星
你以為毛毛會講《家有囍事》？畀你估到就唔係毛毛啦～要講就梗係講同家有囍事差唔多卡士，有毛姐同哥哥，但係就有埋劉青雲同梁家輝兩大影帝，仲要有埋袁靚靚同Dodo 姐嘅《大富之家》啦！
當然仲有當時未入政壇未知自己前世老婆係邊個嘅任求其啦，唔講真係唔認得㗎！最經典都係睇哥哥點樣逐個冧掂成家人，仲要幫黃百鳴變妝做女人，變做工人莎朗嚟整蠱霑叔！
毛毛精選對白： 「齋啡，冇奶！」（齋啡係DoDo姐戲內畀學生叫嘅花名）
用法： 除咗喺茶餐廳可以叫返杯之外，仲可以幫你嘅好朋友改個親䁥嘅花名，當全世界都以為佢好鍾意飲齋啡，只有有睇過嘅朋友先知咩事⋯⋯
《超級學校霸王》
大卡士指數：4粒星
講大卡士點可以唔講呢套，雖然係某蝗姓導演作品，但係一套笑片可以集到四大天王其中三個，仲要加埋劇集王牌嘅張衛健，呢個組合真係可一不可再！最緊要係大部分演員都要Cosplay 街霸，掃帚頭嘅學友真係經典中嘅經典！
當然毛毛主要睇嘅係學生妹look嘅Charlie姐姐同埋cosplay春麗嘅女神邱淑貞啦，同場加映仲有做春麗老母嘅苑仔苑瓊丹?～張衛健變做悟空款嘅「吳君如」出元氣彈都真係估你唔到呀！
毛毛精選對白：「呢個世界真係美麗，啲空氣真係清新。」
用法： 當你每次畀豬隊友激親，或者畀腦細啲入房照肺，不妨跟戲中做阿媽嘅苑仔一齊深呼吸，講下呢句對白。雖然之後你應該都仲係會同大雄一樣咁想死⋯⋯
《射雕英雄傳之東成西就》
大卡士指數： 5粒星
嗱嗱嗱，呢套戲如果你話冇睇過就好打有限喇！有咁多個影帝影后一齊拍賀歲喜劇，幾乎係冇咩人可以想像到，其實係因為呢套戲係《東邪西毒》嘅 孖生作品，所以係原班大卡士咁拍，當年有邊個會諗過風度翩翩嘅偉仔竟然會掛住一孖潤腸喺個嘴度，仲要用性感嘅眼神教學友溝女女？
而學友簡直就係一眾兵仔嘅典範，竟然可以用一首《我Love你》就打動祖賢女神個心，榮升將軍，呢套簡直唔係笑片咁簡單，係勵志片呀！
仲有入面梁家輝男扮女裝同哥哥又唱又跳，毛毛細個睇真係笑到眼水都標，最估唔到都係原來當年幫梁家輝代唱嘅竟然就係霑叔呀！
毛毛精選對白： 「連爛口你都講得出喇，點解你唔可以講三聲你愛我啫！」
用法：妹豬如果對住自己嗰個唔識浪漫嘅男朋友，不妨用呢句同佢講，除非⋯⋯佢覺得我愛你真係仲難講過粗口。
《豪門夜宴》
大卡士指數：5粒星+1
呢套戲可以話係大卡士中嘅XO，但唔係有好多人睇過，因為呢套其實係成個演藝界傾巢而出，為咗賑濟當年華東水災拍嘅電影，基本上由頭到尾，都有星帶住演出，女神王祖賢用真聲講唔咸唔淡嘅廣東話你聽過未？
經典場面除咗有同Google Translate有得揮嘅英文版帝女花，仲有片尾一大班人食宵夜嘅豪門宴場景，街坊嘅選角都別出心裁，當年明蝠俠仲不惜重演自己唱歌走音嘅黑歷史，仲有富貴逼人系列一家人對六合彩劇情。
最估唔到仲要有星爺同一代笑匠許冠文爭雞頭嘅演出，呢種卡士同編劇心思⋯⋯今時今日仲可以去邊度睇？
毛毛精選對白：「你阿爺係邊個咁犀利，可以救到我呀？」
用法： 有啲人有難變咗2.0畀人圍剿，就會好需要搵阿爺救㗎喇 。55，但首先，要阿爺肯救你先囉⋯⋯
其實好睇嘅笑片又點止咁少，只係要數，真係數到天光都數唔完，呢啲那些年嘅笑片，有好多組合已經冇咩機會再睇到，因為有好多好戲之人都離開咗，更重要嘅係，以前劇情同卡士並重，而家嘅笑片，就算幾大堆頭同幾大卡士，香港人都已經笑唔出⋯⋯
