細個特別容易滿足，只要有啲小確幸，就可以足足開心一日。咁又係嘅，話晒冇咩嘢係要自己擔心，又冇咩選擇，簡簡單單咪過一日囉。而到咗大個，有錢有選擇嘞（比起細個），反而就會冇咗嗰種興奮同幸福嘅感覺⋯⋯唉！真係如何回到當時呢⋯⋯

細個食老麥

細個畀阿媽管住，死扭難扭先食到一次M記，難得有得食，識食梗係要食有玩具送嘅開心落完餐啦！仲有呀，假如有得開M記生日Party，簡直就係身份嘅象徵?！

大個食老麥

大個咗之後，M記都係身份嘅象徵嚟嘅⋯⋯變咗窮L身份嘅象徴咁囉⋯⋯人大咗，有得揀，邊個會想食咁多熱氣嘢吖，唔怕爆瘡加喉嚨痛咩？而家食M記好多時咪就係趕時間、想頹食，或者冇銀用囉⋯⋯但係而家連M記餐都加晒價，就嚟窮L都食唔起喇！

讀小學嗰陣嗱嗱臨做晒啲功課為咩？為睇電視、為落公園玩囉！那些年，落公園話晒都要阿媽批准，就算15分鐘都幾大落去爭個韆鞦揈兩嘢啦！再唔係就成班細路一齊四圍跑下，玩下紅綠燈同狐狸先生咁，爽呀！有時玩到成身汗，天都黑埋都唔捨得走呀！

唉⋯⋯老喇老喇，而家唔好話落公園玩，食完飯散個步都懶得郁啦⋯⋯就算去公園係去做咩呀，咪又係喺深夜搵個陰暗嘅角落，做啲大人嘅事⋯⋯你諗咗去邊呀？同班Fd子飲下酒傾下心事咋！

細個識鬼Fat唇咩，有時間都寧願落多幾轉公園，玩多陣玩具，邊有心機自己諗買咩衫吖～每次阿媽買件衫，理得佢係成身喱士定係五顏六色，有得著咪著囉，最緊要係有新衫著！阿媽買新衫畀你即係咩呀？錫你囉！

弊在喺老媽子同老竇心目中，你永遠都係一個BB，佢哋會記住你細個鍾意咩卡通人物，如果喺街度見到嗰隻公仔嘅衫或者其他佢哋覺得七彩繽紛好L靚嘅衫，就會好開心咁買返嚟畀你著。就算你想側側膊唔多覺放埋一邊，佢哋都會問： 「我買畀你件衫呢？做咩唔著呀？」 

?仔嗰陣成日FF自己做咗大人之後會有女、有美麗人生，好想快啲大個唔使畀阿媽管住，咁咪可以打機打通頂都冇人理囉～yeah！仲可以幾時想出去食飯出去食，食咩都可以自己話事，大個萬歲！

但大個咗先發現⋯⋯原來大個只有OT到通頂，就算你想食住家飯，都唔係想返屋企食飯就返到，大個咗，阿爸阿媽都會老⋯⋯望住佢哋越嚟越多白頭髮，而家只係想問：可唔可以變返細個呀？