呢排潮濕到啲衫晾極都唔乾，就算勉勉強強乾咗都成陣味，唔講都知早到的春天已經開始咗啦。春天最好就係賞花㗎喇，街上開滿晒木棉、洋紫荊、宮粉羊蹄甲等等，真係好靚呀，鍾意影相嘅朋友一定要把握機會影多啲相呀！

鍾意影花嘅朋友，又點可以唔去埋維園花展慢慢影呀？今年花展嘅主題係玫瑰，另外仲有桃花呀、鬱金香呀咁，七彩繽紛，真係睇都睇唔切呀～可以畀唔同花包圍住，感覺真係好春天好幸福呀～

不過，喺花展完咗之後，就有人影到呢個咁令人傷心嘅畫面喇。經常出動去救返畀人掉棄嘅物品嘅「我個世界無垃圾」發現有大量繡球花盆栽畀花農當垃圾咁棄置，愛花之人見到一定好心痛！

好彩「我個世界無垃圾」嘅版主盡力救返啲繡球花，送畀有需要嘅朋友咋，唔係就要堆填區見㗎喇！另外，版主表示，花農應該都唔係有心想做大嘥鬼嘅，因為活動完結之後，佢哋要喺限時清場，冇時間同方法免費送畀大家，所以先迫於無奈咁做。希望日後政府搞花展嘅時候，可以多啲指引，避免類似情況發生啦！

封面圖片、資料來源連結： t5uisiu／instagram、我個世界無垃圾