雖然而家只係3月尾，不過相信唔少打工仔都已經日日期待緊4月嘅來臨！點解？唔好扮晒唔知喎，4月有幾日紅日吖嘛！一年容易又清明，有得放返日假真係爽呀！但係，諗諗下，清明嗰日都應該冇得瞓到安樂醒喎，要晨七咁早起身拎住大大袋衣紙去拜山，去完柴灣拜阿公又去和合石拜太婆，好似仲攰過返工……

其實做子孫嘅，又點會唔想向祖先表達敬意吖？只係諗起要去咁遠，先至倒抽一口涼氣啫。唔知如果將高科技同拜祭crossover又會點呢？唔係講緊online拜拜，打幾隻字就當同祖先傾偈、撳個掣就當裝香嗰種呀，而係日本而家流行嘅高科技墓地呀。

呢個高科技墓地喺東京嘅大廈入面，只要用IC卡一嘟，機器就會自動將祖先牌位、骨灰龕佈置好，送到參拜位置㗎喇。而家土地問題咁嚴重，好多人死後都要排好耐先排到骨灰龕位，用呢個方法就可以慳好多位喇，而且參拜位置仲好似自修室咁分晒一格格，孝子賢孫咪唔怕同其他人迫囉。

拜祭唔係後生仔嘅專利，好多老人家都想拜下老伴同老朋友嘅，不過因為行動不便而唔能夠親自去到墓地拜祭，呢種高科技墓地就照顧到佢哋需要喇！好可惜香港未有呢種高科技墓地，咁多位嚟緊去拜拜嘅時候，記得小心照顧同行嘅老友記呀～

封面圖片、資料來源連結：Yasuyuki Suzuki／日台交流広場（台湾と日本）

延伸閱讀：【阿爺收嘢啦】強國孝子搵性感女女熱舞拜祖先