毛毛身邊有個拍咗拖十年嘅朋友話，曾經有人知道佢拍咗拖咁耐之後，竟然第一時間問佢係咪已經去勻晒全港嘅所有妙思淫！哼，膚淺嘅人類先會覺得行博物館係消磨時間、諗唔到去邊先去嘅地方啫，高智慧生物－喵星人就唔係咁諗喇，佢哋不知幾有藝術修養呀！

最近日本尾道市立美術館搞緊個貓貓主題展覽，展出唔同風格嘅貓貓畫作，大家又可以參加workshop喺面上畫畫，做隻花面貓，一定吸引到唔少貓奴去朝聖啫！

嘩，估唔到啲藝術品又整得幾迫真喎，完全分唔到係真貓定假貓呀下，似到好似喵星人顯靈咁呀！

睇真啲先知原來唔係啲藝術品變咗真貓，而係真係有幾隻住喺美術館附近嘅流浪貓嚟咗呀～咁又係嘅，個展覽同喵星人有關，佢哋本尊又點可以唔嚟巡視下呀？

小橙表示：「呢幾個雕像都整得我哋幾靚仔，唔錯唔錯……」
小黑就話喇：「係咩？我硬係覺得整得肥咗啲啫，朕個頭邊有咁圓喎喵！一於等朕入去教訓下班人類，順便睇下佢哋有冇洩漏喵星機密！」

點知，小黑準備衝入去巡視嘅時候，竟然畀門口嘅保安叔叔攔住咗呀！小黑去左邊佢就擋住左邊，小黑入中門佢就擋中門，真係一個好稱職嘅守門員！最後小黑見攻極都攻唔到入去，唯有輕輕的走了，揮一揮貓尾，不帶走一片雲彩啦。

「入面隻黑貓雕像都係我同鄉喎，你個展覽冇理由冇我份喎！」算啦小黑，不如你都係今晚先偷偷地潛入去啦，話晒你咁黑，熄咗燈應該冇人發現到你嘅……

にらみ合いー突撃ー防御ー再突破ー捕獲ーお見送り。本日も近所の黒猫と警備の方の攻防がありました。特別展「招き猫亭コレクションー猫まみれ」なので入館を許可したいところですが、作品保全のため、丁重にお帰りいただきました。展覧会ＨＰはコチラ：https://t.co/LJMNYF9Vog pic.twitter.com/11m7mWVr3I

— 尾道市立美術館 (@bijutsu1) March 22, 2017

封面圖片、資料來源連結：尾道市立美術館／twitter