古人戴錶、皇帝講英文、廁所板扮鏡呢啲19劇集穿崩位香港人已經見慣不怪，但勢估唔到，原來燒焦屍體都可以就咁搵個黑人嚟扮囉！

是咁的，話說最近有網民翻睇強國劇集《少年包青天2》嘅時候就發現劇中兩具燒焦屍體竟然係由黑人演員飾演，而且仲要係兩位完全冇經過任何特技化妝嘅黑人演員⋯⋯

嗱利申，毛毛當然冇任何歧視黑人演員嘅意思啦。

請黑人做老臨冇問題，之但係你叫人哋扮燒焦屍體，你最低限度都幫人哋化返個燒焦屍體妝先啦下話？家陣就咁利用人哋種族嘅膚色就話人哋係燒焦屍體，劇組咁樣會唔會太唔尊重人哋呢？特技化妝錢唔是咁樣慳的！

咁鍾意慳特技化妝錢，又唔見劇組搵黑人演員嚟做主角包青天？咁咪連包青天個妝都可以慳埋囉！

btw，其實樂觀啲咁睇，強國人都只不過係將lowcostcosplay嘅精神發揚光大啫。早前另一套強國武俠劇《五鼠鬧東京》咪又係咁樣打破傳統，用杞子嚟扮血漿⋯⋯想拍打鬥爆血場面？一大堆杞子掟出去咪係囉，真係既方便，又快捷呀！

#曲線要講明

資料來源：晨曦中的蘑菇／微博

睇埋：【好環保呀】強國劇用杞子當血漿穿晒崩