一講起八、九十年代，你個腦會諗起啲咩？

油～不是八十年代～ 知喇，咁除咗油呢？ 係咪諗下諗下，都係覺得嗰時乜嘢都好似好啲咁，無論係電影、音樂、時裝定雜誌，好似樣樣都係經典、係無可取代，究竟係回憶總是美好的，定係嗰時真係美好啲呢。

唔知點解，聽親八、九十年代嘅歌，唔會有陣Out嘅味道滲出嚟，反而覺得舊時嘅音樂有種獨特嘅味道，就算玩矇眼估歌仔都分得出係嗰個時期嘅作品。

當時嘅歌手有好多，就好似張國榮、梅艷芳同羅文等等⋯⋯佢哋差唔多每一個都有好自己嘅風格同表演方式，就好似哥哥嘅長髮Look同著高踭鞋演出嗰幕咁，畀人一種突破咗舊有性別形象框架嘅感覺，所以先會令觀眾有咁深刻嘅印象。

當然啦，除咗樂壇，當期時嘅電影，而家睇返都唔會覺得遙遠，事關而家成日碌碌下Facebook，都會有唔少人Share返啲舊時嘅電影出嚟，奇就奇在，明明係廿幾年前，你都仲會笑到Gap Gap聲，佢哋搞嘅Gag就好似食咗防腐劑咁，點睇都唔會厭，比而家嘅劇集更加適合用嚟送飯。

咁除咗笑片之外，想當年王家衞嘅《重慶森林》，又係不得不提。相信唔少人第一次睇呢套戲嘅時候，都仲好細個，所以睇完之後都應該冇乜太大嘅感觸，但到今時今日再睇返呢套戲，成個感覺都唔同晒，真係連毛管都戙埋。

電影一開頭就有段金城武嘅獨白：「每日你都有機會同其他人擦身而過，你可能對佢一無所知，不過或者有一日，佢可以做到你嘅朋友或者知己。」雖然呢句嘢聽落就好似阿媽係女人咁，但事實上社會咪又係咁運作，你每日捱驢仔返工，夠有大把機會接觸唔同嘅人啦，又唔見你個個都認識到？所以一切咪又係講緣份，不知幾浪漫，呢啲金句，今日仲拎返出嚟溝女，應該都仲Work～不過好似毛毛呢啲毒L，連行路都唔敢望下人，鬼有機會識到人咩。

利申：睇呢套戲時，最好自己匿埋一二邊睇，方便思考！

講咁多做乜，其實毛毛咪又係個門外漢，係聽都聽專家講啦，而家喺西九文化區嘅M+展亭就有個《曖味：香港流行文化中的性別演繹》嘅展覽，係用一個全新嘅角度去睇香港流行文化點樣展現中性以至流動嘅性別形象，入面仲會有好多八、九十年代嘅展品畀你哋睇餐飽。

圖片來源：

《羅文的光輝舞台》演出照，譚明玉女士捐贈  康樂及文化事務署香港文化博物館藏品

張國榮《熱‧情演唱會》硬照，藏品由夏永康借出

《重慶森林》劇照由Block 2 Pictures Inc.借出，版權所有。

《號外》第173期封面，藏品及圖片由 City Howwhy Limited 借出

梅艷芳《壞女孩》封套，M+藏品， 圖片由香港M+博物館提供

《重慶森林》電影海報， M+ 藏品，又一山人（黃炳培）捐贈，1996年， 圖片由香港M+博物館提供