話說，噚日有網民就幫公司拎張雜誌換領券去7仔度換《東周刊》。

嗱大家睇到，張換領券上面清楚寫明「憑券可免費換領東周刊一期」，而且張換領券又係未過期嘅，照計應該拎張券去7仔度就可以換到啦，但點知呢位網民去到7仔都係唔可以成功換到本《東周刊》返嚟？到底點解呢？

原來7仔阿姐係因為見到張券上面寫住可以免費換領東周刊「一期」，而唔係「第708期」，所以就死都唔肯畀本第708期嘅《東周刊》佢。阿姐表示，想換第708期嘅《東周刊》？拎張寫住可以免費換領「東周刊第708期」嘅券嚟先講啦唔該！

唉，雖然阿姐出到goodest logic呢招真係唔夠佢玩，但冇理由要呢位網民自己出錢買本雜誌畀公司㗎嘛，話晒一本《東周刊》都成廿蚊雞，廿蚊雞可以買到兩本《100毛》㗎喇，作為一個精明嘅員工，梗係一蚊都唔可以蝕畀公司啦！

自己出錢又唔對路，用券換又換唔到，唔通要去第二間7仔博下？

唔使去第二間7仔博喇，搵第二個7仔店員博下咪得囉。好在，憑住呢位網民屢敗屢戰嘅精神，終於喺同一間7仔換到呢本雜誌，唔使蝕錢畀公司咁傻豬豬喇！

資料來源：感謝網民同意轉載