去旅行其中一個期待就係住嘅地方，話晒去旅行日日都咁操勞，除咗食得招積，梗係要瞓得舒適啦～住酒店係舒服嘅，但係成日聽到啲人話邊間酒店好猛，嗰間酒店又好多污糟嘢，話就話平生不作虧心事啫，點都有少少淆底嘅。原來喺酒店見到衣櫃有條裙或者見到本聖經打開咗都未係最驚⋯⋯

有位台灣網友去英國嗰陣喺間房見到呢幅畫，真係當堂嚇一跳，然後得啖笑，好地地做咩畫把咁陰森嘅遮喺度呢？半夜如果聽到滴水聲⋯⋯一定係冇閂水喉啫，嚇我唔到嘅！據說，呢啲畫係喺間房入面嘅裝置藝術喎⋯⋯

所以話藝術嘅嘢，我哋識條頭髮咩？呢度有成紥頭髪喺度，我哋都唔知發生咩事啦⋯⋯冇頭髮嘅朋友，快啲趁機會行埋去拼下睇下自己長頭髮咩樣喇，不過睇鬼片呢，通常黐完埋去就出唔返嚟㗎喇⋯⋯你以為咁就嚇到毛毛喇咩？

嗱！起碼呢幅就嚇到喇！X你，真係睇多兩秒都怕佢會擰轉面同你say Hi 呀！

睇埋呢幅，毛毛終於明喇！原來呢個係殭屍先生主題房！人嚟，Music~ 「明月吐光陰風吹柳望～是女鬼覓愛郎」～真係嚇到心都離一離呀！老老77，喺呢間房瞓覺真係少啲心血都唔掂喎，但係單身狗咪可以唔使驚空虛寂寞囉～機會嚟喇飛雲！

即係咁，間房就好似猛咗啲，訂咗房又冇理由唔瞓㗎喎，咁最後呢個網友究竟點呢？

可以點吖⋯⋯咪唯有遮住佢，當睇唔到囉⋯⋯唔知網友夜晚有冇聽到呢咩聲呢？所以話，旅行訂酒店都係睇清楚啲相同啲評價先好啲，出事㗎嘛！

封面圖片及資料來源：Yu Han Huang