你有壓力，我有壓力，唔好以為大人先要煩買車買樓結婚生仔呢啲嘢先會有壓力呀，其實小學生一樣好大壓力。成日都話要贏在起跑線呀、競爭會找上你呀咁，對小朋友嘅情緒真係好大影響㗎，最近就有學校出咗張叫工作紙，畀同學仔寫或者畫低日常生活中令佢哋覺得有壓力嘅事物喇。

張工作紙題目係「汽球怎會大起來」（咦，好似係「氣球」先啱喎老師），將氣球比喻成壓力，壓力愈大，個波都會愈漲。呢位小朋友就喺氣球入面畫咗個係咁「罵罵罵罵罵罵」嘅老師同三個扁晒咀、流緊眼淚嘅同學喇，旁邊仲寫住「X Sir常叫我們做很多的功課，又叫我哋做完晒改正，不是的話就會責罵我們。」

老師要求同學做改正都好合理嘅，知錯能改下次先做得啱㗎嘛，不過鬧到班同學仔喊晒口，睇嚟老師嘅態度真係令班同學仔好難受。喺一張叫做「情緒多面睇」嘅工作紙上面發現原來學生嘅壓力來源就係學校，幾咁諷刺……

睇埋一樣都係出自呢位小四同學嘅文字之後，相信大家可以更加了解到而家嘅小朋友對學校有幾抗拒。雖然呢幾段字係小朋友自己隨手寫嘅，但就睇到大家好心痛……

同學做錯功課，老師會要求佢哋改正；希望學校都一樣會改正，正視小朋友嘅壓力來源，還佢哋一個快樂嘅童年。

封面圖片、資料來源連結：不願小朋友成為功課奴隸