通常啲爺爺嫲嫲都特別會錫啲孫嘅，但係老人家嘅愛心，有時做細嘅都未必識欣賞㗎，好似每年一件嘅溫暖牌冷衫、黑鼆鼆唔知用啲咩煲嘅湯，仲有哦極都哦唔完嘅人生大道理，好多小朋友細個都會覺得好麻煩㗎，到大個咗啲老人家唔喺度先知自己走寶呀！

不過呢個阿爺做嘅嘢，肯肯定邊個收到都會勁開心啫！是咁的，外國有個妹豬叫Lauren，細個嗰陣係畀爺爺湊大嘅，早幾日佢16歲生日，爺爺送咗份大禮畀佢呀～咦，送馬仔定車仔呀？定係成功靠爺幹，阿爺咁快就送層樓畀佢呢？

下⋯⋯三本簿咋？望落好似只係十幾廿蚊本嘅Notebook咋喎，唔通阿爺係武林高手，留低啲武林秘笈呀發達秘笈之類嘅嘢？定係阿爺係食神，要傳啲曠世食譜畀孫女呀？

你估大台拍劇咩～人哋阿爺邊得嚟咁神化呀！原來阿爺十幾年前將孫女2至5歲嘅生活點滴，寫滿晒呢3本簿，仲要特登keep起，等到孫女16歲生日先送畀佢，真係Kind of Sweet呀～

有圖有真相，由2003年Lauren 2歲嗰陣開始寫，講到明係「Day to Day Record」即係每日都有寫㗎～

阿爺仲要寫到密密麻麻咁，真係好有心機，睇到妹豬都濕晒呀⋯⋯對眼。梗係啦，就算係男朋友或者老公都未必有咁嘅恆心，日日寫低同你一齊嘅美好回憶㗎喎！如果話阿爸係阿女嘅上世情人，阿爺就肯定係孫女嘅上上世正印啦！

啲人成日話情人眼裡出西施，其實阿爺同老竇眼中咪又係出天使，好似呢篇寫嘅咁，明明個孫女做緊啲傻豬嘢，但係阿爺望住你不知幾冧呀～

有個為自己做咗咁多嘢嘅阿爺，係開心嘅。其實淨係有錫晒自己嘅爺爺嫲嫲陪住成長，就已經比好多人幸福啦～所以，如果屋企老人家仲喺度嘅，就要好好珍惜佢哋喇，唔好等失去咗先諗起佢哋以前點錫你，然後到時先嚟後悔呀！

封面圖片及資料來源：renblankk／twitter、buzzfeed