要你餐餐食M記，你可以食幾多日？一日？一個禮拜？一個月夠喇啩？就算再鍾意食M記嘅人，要你餐餐咁食法，唔肥死都會食到厭啦～細個會好羨慕做M記嘅人可以成日食薯條，仲可以拎張六折卡出嚟同啲fd子一齊食，呢啲叫咩呀，威囉！大個先知道佢哋有幾辛苦呀！

但係美國有個94歲嘅阿婆，唔止食極都唔厭，仲要喺M記返工做足44年呀！就連店長都忍唔住要幫佢開P慶祝呀～

中間呢位笑得咁燦爛嘅婆婆就係Lorraine姐，真係好似迎春花咁，人人都愛她㗎～咪睇佢一把年紀，人哋不知幾精靈呀！離遠見到個客行緊入嚟就已經記得個客要咩，仲整定埋畀佢?呀！所以有好多客仔都指定要搵佢㗎～

Lorraine姐由1973年開始喺M記做，從來都冇諗過要真係退休，實行活到老，做到老咁話喎～問佢點解咁大年紀仲要喺度做嘢咁辛苦呀？佢話做咗咁耐，都當正自己啲客係朋友啦，叫佢唔做，反而仲日日心掛掛?，所以一星期都要keep住返兩更。

最估唔到嘅係Lorraine姐熱愛M記到食足每日三餐，而佢嘅最愛就係魚柳Bell喇！ 就算病咗，啲同事都會特登外賣拎畀佢食㗎！見婆婆面色紅潤靚過人，唔通M記同鉛水一樣可以延年益壽？哦，咁以後咪有藉口叫女朋友陪你捱老麥囉～yeah～

嗱嗱嗱，做咗44年，除咗開P同食蛋糕，腦細係咪應該要有返啲表示先？起碼都要有獎金獎品啦！

下，得張紙同嚿磚咋？我真係多謝你呀。話晒做咗44年，起碼都要送張終身免費任食魚柳Bell Chan嘅VIP卡啦下化！不過婆婆咁愛M記，就算咩禮物都冇，睇嚟佢都唔會介意嘅～最緊要做得開心啫！

封面圖片及資料來源：ABC News