喺日本除咗食魚生同拉麵，有樣嘢都係必食㗎！就係便利店嘅飯糰喇～明明都係一嚿飯加啲餡，唔知點解就硬係覺得好食啲嘅。返到香港有時想自己整下回味下，但係啲餡嚟嚟去去唔係梅就肉鬆，個人都夠晒dry㗎啦，食啲嘢可唔可以juicy啲呀？

最近日本嘅味之素就出咗一種飯糰餡，平日唔用就放入雪櫃，到想食嗰陣就拎一粒出嚟用熱辣辣嘅飯包住佢，等佢自然解凍，咁就可以有好Juicy嘅飯糰食喇！最緊要係佢哋竟然搵咗可愛嘅櫻井翔做代言呀！

睇到阿翔食得咁開心，仲要吮晒手指咁，真係見到都想食呀～食個飯糰定阿翔？心照啦衰鬼～

有位駐日本嘅台灣網友睇完就買咗咖喱同豚角煮味返去，發現呢隻飯糰餡原來除咗用嚟包飯糰，仲可以整爆汁飛碟多士㗎！

要整呢個飛碟，首先你要有部飛碟機先。咁你就已經成功咗一大半喇！只要放兩塊包，再放兩粒自己鍾意嘅餡上去，再放兩塊包上去，一嘢夾落去，等一陣就食得～

望落去漲卜卜，又幾吸引啵～唔知入面係點㗎呢？

一切開，真係出晒汁呀！隔住個mon睇直程出晒水?啦，成地都係口水呀！咁容易整，就算地獄廚神都應該整到喇啩？應該係嘅⋯⋯不過就算幾易整又點吖，咪又係要等香港有得買先有得食⋯⋯咪住先，邊個同事頭先話去日本話？

封面圖片及資料來源：Taiwanjin／twitter、arashijs_info／twitter