現代人日日返工已經要對住個電腦，OT完又要望電話碌FB同ig仲要打埋機，好難唔頸緊膊痛嘅～呢個時候就要搵個人幫你鬆鬆喇～咪臭係「殺龍巴斯」囉！搵塊貼身膏布貼一貼，當堂舒服晒～不過成塊白色嘢咁覺眼又咁痴身，點媾女女呀！

咁咪學下台灣呢位兄台咁囉，只要有心，膏布都可以變畫布！咁大塊白色嘢，一於叫老婆仔發揮下創作力量同幻想畫靚佢！

老公仲怕會瀨嘢，特登畀埋幅參考圖老婆叫佢跟住畫，嗱，記住要日式嘅，條嘢最緊要就係夠威猛！講緊條鯉魚呀，仲有背景記住加返啲波浪，男人要經過下啲風浪先夠Man㗎嘛！貼住呢幅圖肯定啲女女見到都忍唔住望多兩眼～

喂～呢位兄台有個老婆仔幫你貼膏布就好感恩啦～一班毒L想搵個人幫佢貼都難呀，你仲咁多要求！你今個月畀咗家用未先？但係老婆仔又真係咁聽話，跟足佢指示畫喎⋯⋯

我真係恭喜你呀！完全符合晒你要求呀，要日式、有波浪，仲有埋好威武嘅鯉魚王，全中喎！

嗱嗱嗱，人哋老公，你老婆畫得咁辛苦，你唔係唔貼下化～

而家咪幾好囉，肯肯定行到去邊都有人望住你，仲有大把蘿莉圍住你話要捉鯉魚王呀，益咗你啦～記住叫老婆畫足三百九十九塊，然後儲起佢，話唔定下一塊會進化做鯉魚龍呢～

封面圖片及資料來源：黃智瑜