既然吳焗腸一個月都可以睇到30本書，咁作為一個識得生涯規劃嘅小朋友，一得閒就睇多啲書都好應該吖係咪？不過咁，兒童圖書有好多種，要睇都要識得揀啱你嘅兒童圖書嚟睇先得㗎！

最近，有日本網民就同大家分享咗一本好詭異嘅兒童圖書⋯⋯

故事一開波就有個著住紅色衫嘅小朋友，佢青椒唔食、蘿蔔又唔食，見到面前有個咩都食嘅迷你版自己，佢仲諗住塞晒啲自己唔食嘅嘢畀人哋食?！

點知個迷你版嘅自己食晒佢唔想食嘅青椒同蘿蔔不但止，仲連其他嘢都食埋⋯⋯

唔止咁，呢個迷你版嘅自己仲愈食愈大隻，最後居然好似進擊的巨人咁連呢位小朋友都吞埋落肚?⋯⋯天呀！毛毛究竟睇咗啲咩呀？

唉小朋友，你喊都冇用㗎喇，鬼叫你咁偏食咩，所以而家咪冇得快高長大，仲畀人哋食埋落肚囉！btw，如果你以為又係嗰啲小朋友知道自己錯，然後發現自己只係發夢嘅TBB情節，咁你就錯喇⋯⋯

媽媽返嚟讚阿仔食晒啲嘢好乖，但佢冇發現⋯⋯個仔著住嘅係藍色衫㗎⋯⋯呢本分明就係兒童怪談啦！唔知阿仔個名係咪叫阿榮呢⋯⋯

封面圖片及資料來源：nanotter0115／twitter