五月天噚晚喺台灣大安森林公園開演唱會，有成3.5萬fan屎去到支持佢哋呀！點解喺公園開show咁得意，之唔係因為呢度係佢哋想重回舊地，返到20年前開過show嘅地方同大家見面囉！

唱咗成兩個半鐘，就算幾唔捨得，個演唱會始終都要完嘅～阿信提提大家「離開時記得帶走回憶和垃圾！」 ，成班五迷真係好聽話照住做㗎，聽完歌就齊齊留低執垃圾，雖然有咁多人嚟到睇show，但最後成個公園都依然乾乾淨淨，五迷真係好強呀！

可能唔少人都覺得睇show嘅時候大家一齊跟住個beat揈螢光棒好有feel㗎，不過呢個畫面喺噚晚就冇出現喇，因為事前公園處已經呼籲歌迷唔好帶螢光棒入場，所以大家都好乖。大家一齊清理公園之餘，仲由源頭開始唔浪費，唔玩螢光棒，做得好呀！希望大家以後睇show都可以好似佢哋咁，享受演唱會之餘，都盡力愛護環境啦！

封面圖片、資料來源連結：ETtoday、自由時報