之前有套《PetPet當家》，呢個名好似唔夠傳神喎，人哋明明係講緊啲寵物嘅私密生活，啲寵物趁主人唔喺度就一齊做派對動物㗎嘛，叫《PetPet的秘密生活》就差唔多！真係聽到都興奮呀～

好多人嘅寵物都試過靜靜雞走佬又返番嚟，你又知唔知佢哋出去做啲咩呢？唔會真係開P啩，最多咪同班fd子出去溝⋯⋯通下，聯誼下啫～

呢隻龜龜叫Odette，我哋姑且叫佢做O姐啦下。聽主人Thomas講，O姐平日都幾奔放貪玩㗎～成日都玩伏匿匿，玩完又會識去狗狗兜度開餐㗎喎～

點知有次O姐玩玩下，就堅失蹤咗呀！嚇到Thomas鼻哥窿都冇肉呀，仲要一走就幾個禮拜都唔見人，唔通O姐跟佬走？毛毛唔信！O姐唔係啲咁嘅龜嚟嘅 ！

都話㗎啦～女人嘅嘢，返下外家扭下計，等啲男人緊張佢多啲啫，一定係咁！咪住先，O姐你個背脊好似有啲嘢喎？

哎吔，今次斷正喇！O姐你玩咩玩到成個背脊都係心心貼紙呀，你講，你出面係咪有第個男人，你係咪去咗啲唔正經嘅Party！嗚⋯⋯你點對得住Thomas BB呀⋯⋯

Thomas將O姐嘅呢輯Party激情過後嘅無碼相放上Facebook之後，有一個鄰居終於忍唔住要講個真相出嚟喇！

謎底已經解開⋯⋯P就係P，不過O姐係去咗鄰居個女個生日P咋！人哋阿女見O姐咁捧場，咪黐啲金色心心上去O姐個身度扮靚靚囉。Party都未完，O姐已經急急腳咁返屋企，費事Thomas咁擔心吖嘛～

雖然O姐你已經特登趕返嚟，但係你明唔明呀，Thomas最傷心嘅唔係你走咗出去玩，係你去開P都唔預佢呀！你明唔明一個單身狗主人自己一個留喺屋企，發現連隻龜都多節目過佢，係幾咁難受先得㗎。乖，下次開P叫埋主人去，介紹佢畀啲女女識好唔好？

圖片來源：the Dodo