毛毛有個夢想，就係每日都可以攤喺張梳化度咩都唔使做，但係都有人工收！咁嘅生活有邊個唔想吖⋯⋯唉，咁大個人都係唔好咁多假設性幻想喇，快啲返出去做嘢啦。但係原來喺俄羅斯，真係咩都有可能㗎！

你哋實以為做戰鬥民族，一定連返工都好似打仗咁啦～錯晒！有個26歲妹豬，居然搵到份尖Job，做梳化測試員，每日坐十個鐘梳化，一個月就有8000蚊人工喇！有冇筍成咁呀！

真係有咁大隻蛤乸隨街跳？俄羅斯有間傢俬公司，雖然平日都會喺專業嘅實驗室度做一大輪測試嚟確保梳化質素，但係機器始終係機器，坐梳化講feel㗎嘛，咪搵個真人試下畀feedback囉～

於是間公司就喺上個月開咗呢個職位，仲有成5千幾人報呢份筍工呀！坐喺梳化度hea就有錢收，梗係爭崩頭啦～最後佢哋睇CV揀咗7個人（唔好問毛毛點揀，我都想知呀！）。再喺7個人入面揀咗做開Marketing嘅妹豬出嚟喇～

但係收得錢，你估真係瞓喺度唔使郁咩？起碼都要開張梳化床出嚟嘅。跟住做咩？你想喺張梳化做咩咪做咩囉。

學下經理教路咁喺張梳化度正正經經咁做下運動又得。瞓喺度擺甫士又得。

再唔係喺張梳化度玩下拋橙都得～得咗！

就算係喺張梳化度喪跳喪彈都冇問題呀！咁又係嘅，唔試真啲又點知張梳化夠唔夠彈力呀～試梳化呢啲粗重嘢，好似兩個人試好啲喎，不如等毛毛幫你吖？

公司話而家妹豬暫時仲係試用期緊，不過如果妹豬真係幫到佢哋改善梳化質素，唔排除三個月後會轉做長工喎⋯⋯嗚呀，啲葡萄好酸呀，點解公司唔開返個職位負責試下pantry邊隻零食好食呀？

封面圖片及資料來源：Филиал ВГТРК ГТРК "Башкортостан"／youtube