2003年，Leslie同我哋開咗一個冇人願意相信嘅玩笑。14年過去，大家仍然想念呢位舞台巨星嘅風采，仍然為Leslie一顰一笑、一舉手一投足而著迷。用到「著迷」呢個詞語去形容對Leslie嘅感覺，而唔係單用「鍾意」，係因為只要你細心望住佢雙深邃迷人嘅眼睛，就會好似酒醉一樣，不能自拔，只可以一直咁沉醉落去……

今日，就等我哋一齊回顧Leslie永印歌迷心中嘅多個經典造型。

白背心／《阿飛正傳》、《春光乍洩》

有啲人有打扮過、執到正嘅時候，你就會發現佢原來都唔差。至於Leslie，只係著住簡單一件白色背心底衫，佢嘅魅力已經足夠顛倒眾生。

正直書生Look／《倩女幽魂》

原著蒲松齡小說集《聊齋志異》入面對寧采臣嘅形容係「性慷爽，廉隅自重」，係一個為人正直嘅公子，面對聶小倩嘅引誘，竟然冇犯到天下所有男人都會犯嘅錯，反而斥責喝退小倩。Leslie好多時畀人嘅印象都係多情浪子，但喺電影《倩女幽魂》入面著正直書生look，一樣有可愛、單純嘅感覺。

風流倜儻長衫Look／《胭脂扣》

身穿長衫、蠟起頭髮嘅造型，相信我哋而家呢個年代，都唔會喺街上見到有人咁著，但呢一身打扮嘅魅力，完全冇時間限制，活喺廿一世紀嘅我哋，一樣會為30年代嘅十二少而痴痴醉。

嬌柔花旦Look／《霸王別姬》

Leslie喺電影《霸王別姬》入面飾演梨園中人程蝶衣，由於天生斯文秀氣，被選作旦角，經常要反串女兒身。雖然化上厚厚嘅花旦妝，但仍然可以見到Leslie俊美嘅輪廓。

頹廢Look／《東邪西毒》

對感情絕望嘅歐陽鋒不修邊幅，一頭長髮加上留鬚，感覺頹廢孤獨，但因為Leslie，竟有另一種美感。

大熱長髮Look

Leslie喺《大熱》MV、 《熱情演唱會》都曾以長髮造型示人，可能有人覺得同佢一向風流倜儻嘅形象太大出入，表示唔能夠理解，但其實呢個打扮嘅Leslie，男身女裝，係想帶出雌雄同體嘅感覺，希望大家打破對性別呢個觀念嘅死板印象。

女裝打扮

喺《熱情演唱會》嘅台上，Leslie多次以女裝示人，大膽妖冶。當時部份報章都批評Leslie「扮女人」、「黔驢技窮」、「長髮似貞子」、「靠外在吸引眼球」等等，並冇了解Leslie每個誇張嘅造型背後，係一顆堅持做自我嘅心，正如演唱會最後一首歌《我》嘅歌詞所講：我就是我，是顏色不一樣的煙火......

十四年過去，我哋依然可以感受到Leslie身上所散發跨越時代嘅美態。

你離開了，卻散落四周。