而家影相咁方便，你估仲要好似以前咁計住仲有幾多張菲林咁捨得先撳掣咩！不過要成功影到一張靚相都唔容易，要顧及好多因素㗎，呢個甫屎又要影下、呢個角度又要影下，揸機嗰個真係要專心望實個model先得㗎！

小朋友大得快，媽咪梗係唔可以放過每個機會，幫囡囡有幾多影幾多，趁童年留倩影啦～阿女條短裙仔就襯返頭頂個蝴蝶仔、金色頭髮就襯返後面畀風吹緊嘅芒草，呢個畫面真係唔錯啵，第日大個女拎返嚟做FB頭像都見得人呀下！不過呢，右下角堆雜物呀膠水喉呀就亂咗啲囉，如果可以執走佢就好喇。

咦！睇真啲，乜條膠水喉有紋嘅！原來係大毒蛇嚟呀！媽咪仲掛住幫阿女影相，唔即刻抱佢走？！其實媽咪都係後來睇返相，先發現死神在身邊，嚇到一額汗咋。佢影相嗰陣，仲以為條郁郁下嘅蛇係畀風吹緊嘅樹皮咋，唉，今次就話好彩啫，下次唔知會唔會又發現原來有隻大黑熊睥實囡囡㗎嘛，影相嘅時候，都係留意下身邊事物好啲！

有人問我，我就會講，但是無人來……囡囡擺晒甫屎、著到靚靚咁，最後都唔夠條路過嘅蛇咁搶fo，其實都幾慘。就好似呢個幼稚園小妹妹都係呀，明明受電視訪問嘅係佢，但世人嘅目光都擺晒喺後面個攝鏡男仔手上件陶藝作品，公平咩……

封面圖片、資料來源連結： Bianca Dickinson 、EVER3875／twitter