好多人都以為做毛毛呢啲位好爽歪歪，日日上下網，Post下文，同你班友吹下水咁又過一日。你以為啦！唉，你班友仔幾難服侍先得㗎～搞gag你又話人爛，又成日留啲對白考人喎，估唔到而家連PS都要幫你做埋呀！

台灣呢位電影頻道嘅網編早兩日收到一個「忠實觀眾」嘅PM話想網編同事幫幫手，將成張Poster啲字PS 走佢，等呢位觀眾可以有一張齋有亞美利堅隊長盾牌嘅Wallpaper放電話咁話喎！嘩，家陣做電影頻道網編咋喎，你估個個都係PS大神咩？

嗱，盡晒力㗎喇，有兩個圈圈中間又有粒星星，咁都仲唔係美國隊長？不過網友唔止唔收貨，仲鬧可憐嘅網編係死?仔呀！

話晒都一番心意，你咁鬧網編，真係搞到人哋心都碎了一地呀，網編小朋友咪Post呢段對話上網等大家安慰下佢囉～點知竟然引晒四方八面嘅網編出嚟，仲一齊發揮無窮無窮小宇宙，個個畫自己嘅Icon頭像出嚟Show下畫功呀！毛毛嚴選咗啲參戰作品，同大家一齊學下嘢！

認真篇： 

嘩，呢幾個點夠你玩呀！Philips Beauty嘅朋友仲要連漸層都畫埋出嚟，你玩晒啦！最估你唔到係連民進黨嘅網編都玩埋一份呀～換轉係香港⋯⋯

易過借火篇： 

你哋班人渣⋯⋯你哋走啦，我唔想搞大件事呀。最過份都莫過於National Geographic嘅朋友⋯⋯得一個長方形你都唔自己畫，又要電影頻道嘅網編大大出手喇！

出cheat篇： 

原來Sony嘅Logo係咁嚟嘅！長知識了！點解呢隻蝦咁熟口面㗎呢⋯⋯唔通索尼去咗呃蝦條？喺夜媽媽大家都咁餓嘅時候PO隻蝦出嚟，皇上，索尼罪大滔天呀！

有見咁多位網編同行都咁踴躍，毛毛都決定出賣某腦細，送張福利圖畀大家，作品名為《黑暗中的腦細》。

下，睇唔到？較光啲試下啦，都係睇唔到呀？咁毛毛都冇計㗎，係咁黑㗎嘛⋯⋯

封面圖片及資料來源：Star Movies（Taiwan）／Facebook