「冬甩個爸爸～冬甩個爸爸～多啦A夢吳～」成日聽到呢句，都覺得叮噹應該要開返間主題冬甩店，話晒都係冬甩個爸爸呀嘛！雖然冇叮噹主題嘅冬甩，但係日本同其他哋方都有出過叮噹造型嘅包，仲係去便利店就買到，真係羨慕死人喇～

越南嘅Family Mart仲要唔止有叮噹，差唔多稍為多戲份啲嘅角色都有出包呀～靜宜、技安同阿福就梗係有份啦～

估唔到連大雄阿爸阿媽都有份喎！可唔可以要個野比玉子冇戴眼鏡版呀？喂，大雄阿爸阿媽都有份，咁大雄呢？咩話？冇？！最近Family Mart又話有新嘢出喇喎，以為應該到大雄啦係咪？點知⋯⋯

竟然係出靚仔版嘅技安包呀！係咪覺得好熟悉好奇妙但係又講唔出喺邊度見過佢呢？梗係啦，佢淨係出現過兩次（新版同舊版各一），加埋5分鐘都冇呀！

咪臭係技安貪心得濟搞到跌咗落個樵夫池度，然後個女神拎上嚟送咗畀其他人嘅靚仔好人版技安囉！又靚仔又善良咗咁多嘅技安，個內餡梗係甜絲絲嘅朱古力啦！

不過講到尾都係嗰句⋯⋯大雄竟然連出現咗五分鐘唔夠嘅配角都不如呀，大雄心裡苦但大雄不說⋯⋯如果畀佢知道連Dream Bear老師都有份出包，就係偏偏冇佢份，佢應該又會喊住大叫：「叮噹呀～」咁㗎喇……

封面圖片及資料來源：itmedia.jp、Family Mart Vietnam／Facebook