有時出去旅行，見到啲人拎住一堆紀念品走過嚟賣，都真係唔知買唔買好呀⋯⋯唔係話驚畀人呃，而係有時幫完一個買就有成堆人衝過嚟圍你，你都唔知點甩身呀！一陣買咗又有啲人話會助長咗啲乜乜犯罪集團，真係好矛盾㗎⋯⋯

即係咁，如果畀著你撞到一個小朋友，赤腳四圍行咁問人買唔買花，你幫定係唔幫先？為咗幫細路一個細路，你可以又去到幾盡？你以為拎張大紙出嚟買晒佢手上呢花就叫型呀，跟呢位阿哥學下嘢啦！

呢對黑猛猛嘅腳係屬於一個14歲嘅男仔，唔好話著鞋唔著襪，佢連鞋都未試過著呀陰功！但係點解佢會喺瀨茄度睇鞋度腳㗎呢下？

就係多得隔籬嗰位型男囉，咪睇佢雙手咁多公仔，其實心地不知幾善良呀！佢見到呢位小兄弟赤腳賣花咁辛苦，於是帶佢買返對鞋，起碼行都行得舒服啲呀嘛～

不過都要讚下呢位Sales，雖然弟弟對腳黑猛猛咁污糟，佢都冇嫌棄過，仲好用心咁幫弟弟度size?！最後弟弟揀咗對黑色嘅波鞋，仲笑得好開心咁啵～梗係啦～話晒第一對鞋喎！

不過唔止咁少嘢嘅，你以為可以瞞得過毛毛呢對精明眼咩？由地下個紙袋可以睇到，型男仲請弟弟食M記大餐?喎！

你以為故事咁就完？呢位型男買完鞋臨走都仲問店員邊度有啲平靚正嘅新衫買畀呢位弟弟呀！雖然弟弟之後都好可能要繼續賣花做嘢，但至少佢都過咗開心嘅一日吖～相信佢都一定會永遠記得呢個經歷同呢個好心人㗎～所以話，做人唔可以齋睇外表嘅，邊個話周身紋身嘅人就一定惡㗎？

封面圖片及資料來源：Ahyan Yerro／Facebook