2017年04月02日 星期日
【會唔會係咁】竟然有人放張卡紙喺部夾公仔機個出口度咁狗？
話說，有台灣網民去買嘢嘅時候就喺舖頭門口見到個小妹妹喺度夾緊公仔，個小妹妹夾到呢位網民買完嘢出嚟都未夾到，然後到呢位網民差唔多要上車走人嗰陣，呢位小妹妹終於夾到公仔喇！
吖～明明呢位網民已經見住個公仔跌落咗去㗎啦，點解小妹妹冇伸手拎個公仔不但止，仲走咗去搵店員㗎呢？而且小妹妹搵完店員之後仲再入多次錢，跟住就唔知做咩好嬲咁拍咗夾公仔機一下兼走埋喎！到底發生咩事呢？
呢位網民覺得件事相當唔尋常，於是佢決定唔上車，走去睇下發生咩事。結果，佢發現個公仔竟然咁樣樣卡咗喺個出口度呀！
嗱，咁就奇怪嘞，照計個公仔跌咗落嚟應該屬於小妹妹㗎嘛，就算個公仔卡住拎唔到，店員都會幫佢拎啦⋯⋯咦！唔係佢開到聲個店員都唔幫佢拎咁衰呀嘛？
雖然小妹妹已經走咗人，但呢位網民都想搵店員問清楚。店員解釋，小妹妹之所以冇得拎個公仔走，係因為個公仔仲未跌到落出口，佢仲喺個出口上面喎⋯⋯下，咁大張卡紙放咗喺度，神之手都整唔到個公仔落嚟啦，家陣係咪玩嘢先？
呢位網民留意到，唔只一部機係咁，原來部部機都係咁。到佢再問多次店員嘅時候，店員又改口話要問廠商先知點解有張卡紙喺度⋯⋯55！
資料來源：dcard
