免費甜品同酒可以話係一間餐廳嘅入門級公關手段呀！你諗下，用嘅錢又唔多，只要揀啱時間送畀啲客，啲客食得開心之餘，又會影相放上網同fd子開心share，年中廣告費都慳唔少啦！

不過要食呢啲免費甜品，除咗生日，最大機會咪係一pair人周年紀念，或者個男嘅要求婚囉！嗚⋯⋯點解唔送畀我哋呢啲可憐嘅單身狗喎，明明單身嘅人先最需要甜品嘅慰藉囉！

冇女冇仔又想食免費甜品？有老死咪得囉！美國有一對老友，為咗食免費甜品，居然做咗場大龍鳳，喺餐廳度假求婚呀！

甜品啫，使唔使玩咁大呀？呢對郎才女貌嘅Fd子，特登成餐飯扮係情侶，女仔去Toilet嗰陣，男嘅就同個侍應講，佢一陣要同自己女友求婚，叫侍應幫忙影個相咁話嘞～

通常呢啲咁嘅情況，做細嘅梗係要同經理單聲，睇下使唔使做啲咩趁下熱鬧，睇下有咩特別安排咁啦～嗱嗱嗱，中計喇，呢樣咪就係呢對偽情侶嘅目的囉！

最後咪真係畀佢哋達成目標，拎咗一份免費嘅甜品囉，難為人哋仲要咁有心機寫個Congratulations畀你呀！咁樣欺騙人哋感情，畀甜品師傅知道真係心都碎埋呀⋯⋯

事後佢哋Post上網講返成件事，原來佢哋兩個呢排心情都唔多好，所以咪諗住搞搞震，氹下自己開心囉，佢哋仲話唔排除會去第二間再試過喎～雖然係有創意嘅，但係呃人始終都係唔多好啵。反正能成為密友大概總帶著愛，不如你兩個考慮下喺埋一齊，話唔定好快會食返次堅嘅免費求婚甜品呢～

封面圖片及資料來源：bathemeinnudes／twitter