學星爺話齋，溝女最緊要兩個字：靚仔。唔靚仔嘅話，有錢都OK嘅。兩樣都冇呀，唔怕，而家啲女仔最鍾意就係啲Man得嚟又有愛心嘅男人㗎喇，跟以下呢個阿哥學下嘢啦！

呢位阿哥叫 Eldad Hagar，佢創辦咗一個專係拯救狗仔嘅機構，但係唔好以為創辦人就唔使做喎，一樣上山落海咩都要親力親為㗎～

今次佢就接咗個膠難度任務，仲親自落坑?！是咁的，救援隊之前見到三隻狗女，但係幾隻狗女驚人到一見到人就出軌，即係出路軌呀，救援隊怕繼續捉佢哋反而會有危險，所以就搵咗住喺附近嘅兩位好心人，間中餵下啲狗女，同update下狗女嘅最新消息囉。

點知冇見一排，咁就出事喇，其中一隻狗女榮升狗媽，仲喺個又窄又深嘅山窿生咗成竇狗B呀。為咗唔想呢班得意BB要過啲流離浪蕩嘅日子，救援隊就去咗個窿度實行救B行動嘞！

嗱，個窿講到明又深又窄，咁最好梗係狗狗自己出嚟啦，所以第一招，願者上釣！一於拎個芝士漢堡引佢哋～最初都成功嘅，但狗狗一見有兄弟畀人捉咗，即刻衝返入個窿度⋯⋯咁就唯有主動出擊啦！

窿呢家嘢，真係唔入都唔知佢有幾深呀。唔入由自何，一入原來成18尺深㗎！古乳有暈，不入犬穴又焉得犬子呢？Eldad哥今鋪真係瞓晒身㗎，仲要兩位美女助手幫手扯佢出嚟?呀！

其實都幾驚險㗎，話晒個窿咁dry咁多沙石，附近火車又成日轟轟轟，個窿冧咗咪大檸樂！睇L住呀Eldad哥！

報料者話，應該總共有8隻狗狗，咁捉埋第8隻就應該收得工啦下化。Eldad哥諗諗下都係爬入啲再睇下有冇漏先。仲爬入啲？會唔會有意外㗎？

係就係意外，係意外收獲呀！原來仲有第9隻匿喺個窿底，好彩Eldad哥冇放棄咋！9隻狗仔都平安無事，咁啱佢哋老竇原來就係早幾日去咗收容所嘅阿Tank呀！希望救援隊快啲帶埋狗媽返去，等狗狗一家團聚啦～

封面圖片及資料來源：Hope For Paw官方頻道／Youtube、National Builder