啱啱過咗個愚人節，你以為就冇事？傻豬嚟嘅，乜你以為整蠱人係愚人節先做得㗎咩？要預防畀人整蠱，只要你毒到冇朋友咪咩事都冇囉～如果唔得嘅話，咪話毛毛唔教精你喇下。古乳有暈，先下手為強，只要你學定幾招，喺啲fd玩你之前玩殘佢咪冇事囉！

好似呢位日本網友嘅老公咁，啱啱個愚人節，見老婆專注打機（唔知係咪飛機遊戲呢），就精心炮製咗個健脾開胃、營養豐富嘅健康小食畀老婆喇！真係廿四孝老公呀～

仲要批晒皮切好晒放喺碟仔度，等老婆打完機休息嗰陣食，真係好體貼呀～不過老婆食咗一啖之後⋯⋯＿你個街呀，生薯仔嚟嘅喂！難得老公咁好心機又咁大工程切到個薯仔咁嘅樣，抵畀你玩嘅⋯⋯

網友呀，其實你老公上年都用過大根（即係白蘿蔔）扮梨嚟整蠱你㗎啦，點解你今年都仲未學精㗎？不過情趣嘅嘢，我哋識條蘿蔔咩～

如果好似以下呢個台灣網友咁，明明唔係愚人節都畀人玩，仲要係做好心畀個阿婆呃，你都咪話唔灰機呀。

是咁的，有日三點幾網友行行下見到有個阿婆周圍行問人買唔買水梨，咪諗住做下好心囉，問呀婆一包幾錢，阿婆話一包250台幣，計平啲畀網友收佢200算喎，嘩，都要差唔多50蚊港幣，乜L梨咁巴閉呀？

算啦，咪當敬老囉。點知佢改口話一包要230台幣喎，當自己聽錯啦，但係冇散紙喎⋯⋯最後網友畀咗300台幣畀阿婆，叫佢早抖罷啦～

網友本來見嗰包「梨」咁核突唔多想食㗎喇 ，但係又唔想做大嘥鬼，咪照食囉，點知一食⋯⋯X你呀，蘿蔔嚟嘅！呢個故事教訓我哋，原來⋯⋯蘿蔔同梨真係好似㗎！55，我今日真係學到好多嘢呀～

封面圖片及資料來源：exmio_／twitter、林崇仁