炒麵麵包係一種傳統日式小食。顧名思義，即係一種用熱狗包夾住炒麵嘅小食嚟啦。嗚哇！一諗起嗰個鬆軟嘅熱狗包同嗰撮熱辣辣嘅炒麵，毛毛就忍唔住出晒口水喇！

而最近，有日本網民就發現有人以逆向思維將個炒麵麵包大改造？

哼！邊個話炒麵麵包一定要麵包包住炒麵㗎？調返轉用炒麵包住麵包一樣得！

呢位日本網民仲話，佢買呢個炒麵麵包嘅時候，店員仲有問佢要唔要筷子?⋯⋯弱弱一問，乜炒麵麵包嘅特別之處唔係在於佢唔使用筷子都食到，夠晒方便咩？要用筷子先食到嘅炒麵麵包仲算唔算係炒麵麵包呀？

唉，所以話你哋呢⋯⋯一味墨守成規係唔得㗎！學子華神話dry，人人都係咁，你敢唔敢唔係咁先？家陣呢間舖頭嘅老闆咪就係敢唔係咁，所以咪成功博到一眾網民咁留意囉！

資料來源：senobeya／twitter