條腰幼啲，幼啲，再幼啲～條腿長啲，長啲，再長啲～

喂，每次post相之前加啲執執是常識吧！而且一係唔執，一執就要執到最完美，好似完全冇執過咁樣！乜嘢道門攣咗呀、乜嘢條欄杆唔夠直呀⋯⋯呢啲咁嘅低級錯誤會發生喺我身上㗎咩？

以為背景冇攣到就唔會出事？少年，你太年輕喇⋯⋯

話說，最近有日本網民發現濱崎步早幾個星期前post上instagram嘅一張全身自拍照相當有嫌疑，話佢疑似將自己條腿拉長咗咁話喎！不過毛毛睇落張相都冇咩問題吖，到底呢位日本網民發現咗啲咩破綻呢？

答案就喺濱崎步隔籬部暖風機度！嗱，就咁睇濱崎步張自拍照就梗係睇唔出部暖風機有咩問題啦，但呢位網民上網搵返部暖風機嘅相對比下就發現部暖風機長咗好多，同官網張相好大出入！

嗯，一個咁細微嘅位都畀呢位網民留意到，睇嚟呢位網民都幾得閒⋯⋯呀唔係，係幾有尋根究底嘅精神先啱！btw，唔通人哋鍾意淨係拉長部暖風機又要話你知咩？

資料來源：2ch、濱崎步Instagram、Hitachi

睇埋：藤原紀香Po全身照曬長腿 後面道門攣咗嘅？