有時返工返到攰，都有偷偷地諗下想轉份唔使用腦、唔使度橋嘅工㗎，做餐廳侍應好似都唔錯喎，落下單、捧下餐、問人要搞菜定懶肉咁又一日喇。不過其實呢一切都係行外人嘅誤會啫，今時今日，咁嘅服務態度邊夠㗎，點先啱？一齊睇下啦～

話說有個日本網民話佢喺一間景觀餐廳食飯嘅時候，無啦啦有個侍應走埋嚟問佢借電話用一用喎。佢開頭都覺得好奇怪㗎喇，自己冇帶咪問同事借，或者用舖頭嗰個囉，做咩會問客人借㗎呢？不過佢都冇話「嗰邊咪有電話亭囉」或者「我全家都好幸福啵」，真係將部機交咗畀佢～

話都冇咁快，侍應應該將部機還返畀佢喇，仲笑住咁同佢講「只有今日咁嘅天空，先影到呢張相㗎～」佢一望下個mon，嘩！係玻璃之鏡呀媽咪！成個藍天同城市都裝咗入玻璃杯度，真係好surprise呀……學到嘢未呀？女仔咪就係咁樣識返嚟㗎囉！

城市人成日都喺人多車多嘅環境入面生活存，就算去唔到郊外，抽少少時間喺戶外地方食個tea，吹吹風曬曬太陽都係relax嘅。不過點解，人哋就有意想不到嘅玻璃之鏡，我就得飛天大盜喎……

封面圖片、資料來源連結：kzsurs／twitter、bolcof2／twitter、stella_n_n／twitter

延伸閱讀：

【放過細佬啦】救命呀有班飛天大盜搶我份下午茶呀！

【道德淪亡】成班賊仔吹晒雞咁公然搶嘢！