可能細個玩得多Barbie啦，搞到腦入面總係一講起換衫公仔就自自然然覺得一定係皮膚白白、金色頭髮、眼大大鼻高高咁先靚嘅。其實世界好大，「外國人」唔係得白種人㗎，迪迪尼公主而家都有個黑皮膚嘅Tiana啦，喺玩具店買到嘅公主，都一樣有黑人版本㗎。

兩歲大嘅Sophia小妹妹因為去便便去得叻豬，所以媽咪就帶佢去買新玩具做獎勵喇，細路女當然就揀咗個公仔做禮物啦！

點知，畀錢嘅時候，收銀員無啦啦問佢哋係咪買嚟送畀人做生日禮物啵，Sophia同媽咪都唔明佢講咩意思，佢就指住個公仔，問Sophia「你肯定要買呢個公仔？佢同你一啲都唔似啵，我哋有其他同你似樣啲嘅公仔㗎～」咦？咩意思先？唔通佢想話白皮膚嘅小妹妹應該揀返個一樣係白皮膚嘅公仔嚟玩先啱數？

呢個時候，Sophia就即刻神回喇：「個公仔同我好似呀！我哋一樣都係醫生，一樣都係pretty girl！你見唔見到佢把靚靚頭髮同埋個聽診器呀？」原來，喺小朋友眼中，膚色嘅分別根本唔重要，就好似媽媽所講嘅咁，「每人嘅膚色都有分別，正如每人頭髮、眼睛都唔同色，但我哋嘅剪影都一樣咁美麗」。

媽咪將呢個小故事post上網之後，唔少網民都話好同意小妹妹嘅諗法，仲話自己個小朋友都一樣，唔會用膚色去將人分類，而且仲好錫自己個黑人公仔?！

識唱嘅朋友一齊唱！可否不分膚色的界限～願這土地裏～不分你我高低～繽紛色彩閃出的美麗～是因它沒有分開每種色彩～～～

封面圖片、資料來源連結：Brandi Benner、Love What Matters