行山除咗要識路，最緊要係留意周圍嘅環境同情況，話晒始終唔係你地頭呀嘛。咁啱撞到啲嗰度班陀地動物，以為你同佢哋爭地盤就唔好啦～特別喺外國，行山就唔止有機會撞到野豬同馬騮咁簡單，可能係見到大貓同熊人㗎！呢啲情況梗係三十六著，走為上著喇喂！

嘩，黑熊呀！唔係講緊柔道部嗰個呀，係堅嘅黑熊BB呀！通常有BB嘅地方⋯⋯黑熊老母都應該係附近㗎喎！快啲走啦！咪住先，有啲唔妥喎，隻BB好似死咗咁嘅？美國呢位網友Corey就覺得唔多妥啦，望真啲，好似仲有呼吸，但都唔捱得幾耐喇喎⋯⋯出唔出手好呢？

都係睇定啲先好，所以Corey就行開咗，離遠監察下先。等等下，又唔見熊媽，仲開始落雨?，咁搞法，熊B條命仔真係凍過水㗎喎！

Corey哥忍唔住要出手喇！佢冒住熊媽隨時返嚟當佢係拐子佬嘅風險，抱起熊仔衝去自己車度。但係最近可以送熊仔去邊呢？唔使驚，FB大神喺大廳！

Corey影咗張自拍Post上FB求救之後，即刻頭搖又尾擺咁衝去網民報料嘅野生動物中心度喇！沿路佢仲一見熊仔好似冇抖氣，就幫熊仔做人工呼吸?！

最後平安將熊仔BB送到去動物中心，醫生都話好彩送咗入嚟，原來BB捱咗好多日餓，仲嚴重缺水，而且仲有少少肺炎?呀！如果Corey哥就咁走咗，熊B應該捱唔住㗎喇……

熊仔就平安無事，但係Corey哥就大鑊喇，其實美國有法例講明係唔可以帶啲野生動物出佢哋嘅棲息地，如果畀人捉到唔止可以罰成六千幾美金，仲分分鐘要坐一年監㗎！

不過專家睇完呢個Case，就覺得Corey哥都係做好心啫～況且，黑熊BB個情況咁差，如果唔係Corey插手，BB一早死咗喇！聽完專家意見，警察都係出咗張Warning畀Corey哥就算喇。

有啲人會話萬一你救咗隻動物BB，但係搞到佢阿爸阿媽唔認佢，咪又係害咗佢？係嘅，所以專家都話，除非好似Corey個情況咁危急，唔救唔得，唔係都唔好亂咁幫啲BB呀。話就話大自然係弱肉強食，唔應該插手啫，但係咁都畀Corey撞到呢隻熊仔BB，仲救返佢，都可以話係天意吖？

封面圖片及資料來源：Corey Hancock／Facebook