呢排個個一見面冇嘢好傾，就實係問人睇咗真人版《美女與野獸》未，其實個故仔都由細聽到大啦，教小朋友唔好以貌取人吖嘛，特登入場為咗睇Emma Watson咪即係貪佢靚女？不過人就係咁㗎喇，永遠都對眼行先，唔係讀書嗰時點會成日用外表特徵嚟幫老師同學改花名啫。

佢就係韓國一位數學科補習天王한석원喇，相信就算你唔識佢，只要睇過一次佢張相都會對佢好深印象，仲要今晚諗返起佢嘅時候，第一時間實係諗起佢個地中海先……

阿Sir上堂夠晒棧鬼，啲表情多到好似做緊drama咁誇張，其實又真係好難專心聽佢講緊咩理論嘅……

阿Sir數學又勁教書又生動仲咁受同學仔歡迎，但偏偏就要受到地中海折磨，搞到個個一諗起佢都係諗起個令立立嘅頭頂先，公平咩！有網民睇唔過眼，就出手幫佢key啲頭髮上去喇！嗚呀，呢個咪劉在錫？！Oppa！！！毛毛對眼要戀愛了！

連眼鏡都P走埋，真係成個斯文高材生咁，搞到人哋好想同佢瘋狂計數呀……咦，不過唔係喎，計得多數會唔會又變到好似現實版阿Sir咁㗎？算啦，毛毛突然都係唔想自己數口咁精喇，你由我做一世數學白癡啦，嗯嗯。

封面圖片、資料來源連結：gall.dcinside

睇埋：【係真唔係呀】淨係轉髮型同修眉就即刻成個人靚仔晒？