根據知情人士唔覺意透露，最近成立已經廿週年嘅元祖級天團天線得得B發生內訌，原因就係早排La La Land大熱，個個就算未睇過套戲都聽過曬啲歌，搞到成員Dipsy葡萄Laa-Laa跑出呀……更加有消息指，Dipsy不滿大眾焦點都落晒喺Laa-Laa身上，因妒成疾，精神錯亂，竟然喺上節目嘅時候做出驚人行為，有片有真相，今日就帶大家睇真啲！

節目一開始，天線得得B爭鮮恐後咁衝入錄影廠，希望搶到企中間位嘅有利位置。

當一眾豬隊友仲討論緊今晚食乜餸嘅同時，將悲憤化為力量嘅Dipsy經已成功攝到兩位主持人中間，盡出風頭，仲好熱情咁同男主持擁抱。Dipsy隻手有意無意咁輕撫男主持腹肌，頭部就一厘米一厘米咁逐漸向男主持胸部移近，動機非常清晰。

天線得得B四子喺節目擾攘完一輪，毫無意義地登場大約30秒之後，Dipsy可能腦海入面湧現「人潮內愈文靜愈變得不受理睬」之感，決定自己要搞出意外，突然趁同女主持道別嘅時候使出超級鹹豬手！突如其來嘅襲胸令年過半百嘅女主持又驚又喜，只好用自己雙手捉實Dipsy對鹹豬手，不過都難掩其內心嘅享受……

最後，成功抽曬兩位主持人水、男女通殺嘅Dipsy一邊斯斯然離開，一邊擺出勝利者姿態，面露幸福滿足嘅笑容。相信呢一刻，佢內心最期待嘅畫面，一定係「Again again」。

封面圖片、資料來源連結：News 24 live／Youtube