Pantry，每個返Office嘅打工仔必定會逗留嘅地方。唔好以為呢度只有水機、雪櫃同零食，其實，如果用心觀察，你就可以喺呢個小小嘅空間發現人性……有人入嚟真係只為斟水、有人為咗?下隔籬team個男神女神、有人為咗交換情報（即係講是非）。以下呢五種人，唔知你又有冇喺Pantry遇見過呢？

冇手尾嘅PK

無論係食完蛋撻唔掉個紙盒、寫明要合返埋個蓋都唔合、定係飲完水放隻杯喺鋅盆，都係冇手尾嘅PK！做咩呀而家，以為自己帶埋工人姐姐返工幫你執手尾呀？

唔換水嘅PK

見唔見盞紅色燈仔著曬呀！冇水呀！其實唔夠力換水真係冇問題㗎，不過最緊要你出聲，唔好偷偷地走咗去囉，大家咁熟，唔會話唔幫你嘅！唔係你同用淨最後一格廁紙都唔換埋佢嘅PK有咩分別呀！

偷食嘅PK

點解好地地要寫張告示咒人變唯萎同罰睇張保仔咁邪惡（張紙係兩年前寫落）？咪就係因為有偷食嘅PK囉！大家毫無防備咁將自己嘅寶貴財產放入公家雪櫃，點知就畀PK利用保安漏洞，偷偷地食咗去，令到同事之間嘅信任完全崩壞！

扮買咗手信嘅PK

每當有同事去完旅行返嚟，大家一齊喺pantry食下手信吹幾句水，都係開心嘅。不過留意返，係講緊堅手信呀下，某一日，枱面竟然出現咗罐曲奇，上面張memo仲要寫住「丹麥手信」，毛毛都諗緊點解唔喺大group講聲㗎喇，點知原來條友係拎新年嗰陣屋企食淨嘅曲奇返嚟欺騙我哋感情囉！

將糧食私有化嘅PK

呢位同事，乜你咁多零食嘅？好肚餓呀？睇真啲，同pantry零食櫃啲餅咁似樣嘅餵……公家嘢，肚仔餓拎嚟食梗係冇問題啦，不過你咁樣私有化，好聽就叫「儲起」，唔好聽就叫「霸住」喎。

點解呢五類人全部都係PK？因為pantry係公司嘅一部份囉，公司又係社會嘅一部份吖嘛，咁你話有咩可能唔遇到PK喎！